AQSH o‘zining strategik yadroviy qurollari haqidagi ma’lumotlarni oshkor qildi

2023-yil sentyabr holatiga ko‘ra, Amerika Qo‘shma Shtatlarida strategik kuchlar uchun 3748 ta yadro kallaklari mavjud edi, deya xabar beradi Milliy Yadro xavfsizligi agentligi (NNSA).

AQSH oxirgi marta bunday ma’lumotni 2021-yil oktyabr oyida e’lon qilgan, shundan keyin uning yadroviy arsenali miqdori haqidagi ma’lumotlar oshkor etilmagan.

Bu raqam 1967-yilga nisbatan AQSHning yadroviy kallaklar zaxirasi 88 foizga kamayganini ko‘rsatadi. O‘shanda AQSHda 31255 ta jangovar kallak mavjud bo‘lgan. 

1989-yil oxirida Berlin devori qulagan paytda esa AQSH 22 217 ta jangovar yadroviy kallakka ega edi. Amerika olimlari federatsiyasi ma’lumot berishicha, 2024-yil holatiga ko‘ra AQSH 3708 ta yadro kallaklariga ega.