O‘zbekistonda joriy yilning so‘nggi olti oyida tug‘ilishlar haqida ma’lumot berildi.
Davlat xizmatlari agentligiga ko‘ra, mazkur davrda 10 650 ta egizaklar tug‘ilgan. Ulardan eng ko‘pi Farg‘ona viloyatida, eng kami esa Sirdaryoda qayd etilgan. Tug‘ilishlar bo‘yicha esa Samarqand 50 215 nafar chaqaloq bilan yetakchilik qilmoqda. Eng kam tug‘ilish Sirdaryoda qayd etilgan.
So‘nggi 6 oyda FHDY organlari tomonidan respublika bo‘yicha 97 409 ta nikoh qayd etilgan bo‘lib, shundan 34 704 ta yoki 36 foiz ayol erining familiyasiga o‘tgan. O‘rtacha nikoh yoshi 24 yoshni tashkil qilgan.
Mazkur vaqt davomida 20 yoshgacha farzandli bo‘lgan otalar 4 816 nafarni, onalar 131 217 nafarni tashkil qilgan. Bir yilgacha bo‘lgan nikoh davrida rasmiylashtirilgan ajrimlar soni 1050 ta bo‘lib, eng ko‘p Toshkent shahrida kuzatilgan.
Shuningdek:
- 2 309 nafar erkaklar 50 yoshdan keyin;
- 412 nafar erkaklar 60 yoshdan keyin;
- 34 nafar erkaklar 70 yoshdan keyin yana bir bor ota bo‘lgan.
Aholining o‘rtacha yoshi
So‘ngi 20 yil ichida O‘zbekiston aholisining o‘rtacha yoshi ko‘tarilib bormoqda. Xususan, joriy yil boshida (1-yanvar) mamlakat aholisining o‘rtacha yoshi erkaklarda 28,5 yoshni, ayollarda 30 yoshni tashkil etgan. O‘n yil ilgari (2014-yilda) erkaklarning o‘rtacha yoshi 27,3 yosh, ayollarniki 28,6 yosh bo‘lgan. 2004-yilda esa erkaklarda 24,8 yosh o‘rtacha, ayollarda 26,1 yosh o‘rtacha yosh chegarasi hisoblangan.
Respublikada 2023-yilda aholining tug‘ilishda kutilayotgan umr davomiyligi 74,7 yoshni tashkil etgan. Bu ko‘rsatkich tug‘ilgan (0 yoshdagi) insonlarning kutilayotgan o‘rtacha umr ko‘rish yillari qanchaligini anglatadi.
Mamlakatda yanvar–mart oylarida 205 700 chaqaloq (2023-yil mos davridan 4,3 foiz kam) tirik tug‘ilgan. Eng ko‘p tug‘ilish Samarqand viloyatida (24 075 nafar), eng kami esa Sirdaryo viloyatida (5 066 nafar) qayd etilgan. Hududlar bo‘yicha tug‘ilish koeffitsiyenti eng yuqori ko‘rsatkich Surxondaryoda, eng kam o‘sish Buxoroda kuzatilgan.
Izoh (0)