Isroil aviatsiyasi 20-iyul kuni G‘azo sektori markazidagi Nuseyrat qochqinlar lageriga zarba bergan. Bu haqda CNN nashri xabar qildi.
G‘azo Sog‘liqni saqlash vazirligi va fuqarolik mudofaasi tashkiloti Isroil hujumini tasdiqlagan. Isroil harbiylari hujumdan oldin ogohlantirish bermasdan ko‘plab obyektlarni nishonga olgan.
Dastlabki maʼlumotlarga ko‘ra, hujum oqibatida 13 kishi halok bo‘lgan. Vayronalar ostida yana ko‘plab jasadlar qolib ketgani taxmin qilinmoqda.
Isroil mudofaa kuchlari matbuot bo‘limi ham hujum yuzasidan bayonot bergan. Tel-Aviv rasmiylari hujumda “xavfli terrorchilar” yo‘q qilinganini aytgan.
“Isroil mudofaa kuchlari G‘azo sektoridagi terrorchilar nishonlariga, jumladan, Nuseyrat hududidagi infratuzilma obyektlariga zarba berdi. Qurolli kuchlarimiz tinch aholiga yetkazilishi mumkin bo‘lgan zararni yumshatish uchun katta saʼy-harakatlarni amalga oshirmoqda.
Fuqarolik infratuzilmasi ichida tizimli va tajovuzkor faoliyat yuritayotgan G‘azo sektoridagi HAMAS va “Islomiy jihod” terrorchilik tashkilotlariga qarshi xalqaro qonunlarga muvofiq harakat qilinmoqda”, deyilgan yahudiy hukumatiga bo‘ysunuvchi mudofaa kuchlari tashkiloti bayonotida.
Nuseyratdagi hujumga guvoh bo‘lganlar havo zarbalari tobora ayanchli tus ola boshlaganini bildirgan. Avvalgi hujumlardan farqli ravishda so‘nggi zarbalarni Isroil armiyasi ogohlantirish signali bermasdan amalga oshirgan.
“Vaziyat qo‘rqinchli. Hech qanday ogohlantirish yo‘q, uylarga bomba tashlanishi haqida signallar yo‘q. Biz doimo yashirinib yuramiz, nima uchun va qachon uylarimizni portlatishlarini bilmaymiz”, degan qochqinlar lageridagi hujumga guvoh bo‘lgan 39 yoshli Rahma Abu Hajjoj.
G‘azo sog‘liqni saqlash vazirligi maʼlumotlariga ko‘ra, 7-oktyabrdan beri anklav hududida halok bo‘lgan falastinliklarning umumiy soni 38 919 kishini tashkil etgan. 89 622 kishi jarohat olgan. Vazirlik tinch aholi va o‘ldirilgan jangchilar o‘rtasida tafovutlar statistikasini aniqlay olmagan.
Izoh (0)