AQSHda o‘zi sodir etmagan qotillik uchun 43 yil qamoqda o‘tirgan ayol ozodlikka chiqarildi

AQSHda soxta guvohlik ortidan odam o‘ldirishda ayblanib, 43 yil qamoqda o‘tirgan ayol ozodlikka chiqarildi. Bu haqda BBC nashri xabar berdi.

Manbada aytilishicha, Sandra Hemme yarim asrga yaqin qamoq jazosini o‘tagach, sud tomonidan oqlanib ozodlikka chiqarilgan. U 1980-yilning noyabr oyida Missuri shtatidagi Sent Jozef shahrida kutubxona xodimi bo‘lgan Patrisiya Yeshke ismli shaxsni pichoqlab o‘ldirganlikda aybdor deb topilib, umrbod qamoq jazosiga hukm qilingan.

Sandra ozodlikdan mahrum qilinganda 20 yoshda bo‘lgan. Hozirda esa u 64 yoshni qarshilamoqda. Sobiq mahkumaning jinoyat ishi mamlakat ommaviy axborot vositalarida keng muhokamalarga sabab bo‘lgan. Aynan jurnalistik so‘rovlar va Sandra Hemmening takror va takror apellatsiyalari sudni jinoyat ishini qayta ko‘rib chiqishga majbur qilgan.

Xabarda aytilishicha, dastlab Sandra Hemmening jinoyatga aloqadorligini tasdiqlovchi hech qanday dalil bo‘lmagan. Keyinchalik u psixiatriya shifoxonasida o‘tkir tinchlantiruvchi dori taʼsiri ostida jinoyatni sodir etganini aytgan. Ushbu iqrorlik esa unga umrbod ozodlikdan mahrum qilish jazosi tayinlanishiga olib kelgan.

O‘tmishdagi jinoiy ishni qayta ko‘rib chiqqan tergovchilar ko‘zdan qochirilgan maʼlumotlarni aniqlagan. So‘nggi topilgan dalillar qotillikni sodir etgan shaxs sifatida Maykl Holman ismli shaxsga ishora qilgan.

Gumondor Holman mahalliy politsiya ofitseri bo‘lgan. Kutubxona xodimi Patrisiya Yeshke o‘ldirib ketilgan uy yonida ofitserning mashinasi topilgan. Qotillikdan bir necha kun o‘tib Holman o‘ldirilgan Patrisiyaning kredit kartasidan foydalangan. Tergovchilar, shuningdek, ofitserning uyidagi tintuv paytida marhumaga tegishli tilla ziraklarni ham topgan. Voqeaning sirli jihati shuki, na tergovchilar va na tergov ishida qatnashgan boshqa shaxslar bu dalillarni sudga taqdim etmagan.

Ofitser Holman keyinchalik talonchilik jinoyatlari sodir etishda ham ayblangan. U 2015-yilda vafot etgach, u bilan bog‘liq tergovlar ham to‘xtatilgan. 2023-yil oxirida esa bu ish yana ko‘tarilib, Sandra oqlangunga qadar davom etgan.

Sandra Hemme uzoq yillik mahkumlikdan so‘ng 19-iyul kuni qamoqxonani tark etdi. U Kanzasdagi singlisi bilan yashashga qaror qilgan. Ozodlikka chiqqanidan keyin yaqin atrofdagi bog‘da oilasi bilan uchrashgan, qizi va nabirasini yana bag‘riga bosgan.