Windows operatsion tizimidagi nosozlik ortidan ayrim banklar, to‘lov tizimlari va asosan aeroportlar faoliyatida global uzilish kuzatilmoqda. Bu haqda CNN xabar berdi.
Ispaniya, Germaniya, Avstraliya, Yangi Zelandiya aeroportlari, Turkiyaning Turkish Airlines, AQSHning American Airlines, United Airlines, Delta Airlines, Allegiant, Sun Country, Frontier kabi qator aviakompaniyalar reyslarini kechiktirishga majbur bo‘lmoqda. Microsoft “nosozliklarni bartaraf etish bo‘yicha choralar ko‘rayotganini”, xizmatlar faoliyati asta-sekin barqarorlashayotganini ma’lum qildi. Muammolar Windows va Microsoft kompyuterlarida ham qayd etilgan.
“Bu muammodan xabardormiz va bir nechta jamoalarni jalb qildik. Biz asosiy sababni aniqladik. Hozirda oqibatlarni yumshatish choralarini ko‘ryapmiz. Mijozlar tiklanish belgilarini ko‘rishi kerak, chunki mintaqadagi barcha resurslarga ta’sirni yumshatish bo‘yicha choralar qo‘llaniladi”, — deyiladi kompaniya xabarida.
Microsoft Azure ma’lumotlarni saqlash platformasidagi nosozlik tufayli Amerika aviakompaniyalarining kamida 130 ta reyslari bekor qilindi va 200 dan ortiq reyslar kechiktirildi. Turkish Airlines aviakompaniyasi chiptalarni bron qilish va reyslarni ro‘yxatdan o‘tkazishda muammolarga duch kelmoqda.
Izoh (0)