Isroil bosh vaziri Binyamin Netanyaxu G‘azo sektori janubidagi Rafah shahriga bordi. Bu haqda bosh vazir ofisi maslahatchisi Dmitriy Gendelman xabar berdi.
Netanyaxu Isroil armiyasining 162-diviziyasi joylashgan joyga tashrif buyurgan, harbiylar bilan suhbatlashgan. Unga bosh vazir devoni rahbari Saxi Braverman, Milliy xavfsizlik kengashi rahbari Saxi Xanegbi va bosh vazirning harbiy kotibi, general-mayor Roman Gofman hamrohlik qilgan.
Netanyaxu Isroil G‘azo sektori va Misr o‘rtasidagi chegara zonasi, ya’ni Filadelfiya koridori va Rafah nazorat-o‘tkazish punkti ustidan nazorati “sektordagi operatsiyani davom ettirishda global ahamiyatga ega” ekanini aytgan. U kuzatuv punktiga ko‘tarilib, u yerdan jangovar harakatlar hududini ko‘zdan kechirgan. Isroil bosh vaziri HAMASga harbiy bosim o‘tkazishgina G‘azoda garovda ushlab turilganlarni ozod etishga yordam berishini ta’kidlagan.
“Rafah” nazorat-o‘tkazish punkti Misr va G‘azo sektori o‘rtasidagi yagona o‘tish punktidir. U orqali sektorga insonparvarlik yordamining katta qismi kelib tushardi. May oyi boshida Isroil armiyasi nazorat-o‘tkazish punkti ustidan nazorat o‘rnatdi. Bunga javoban Misr hukumati Isroil bilan insonparvarlik yordamini yuborishni muvofiqlashtirishdan bosh tortdi.
Izoh (0)