Britaniyalik xonanda Adel joriy yilgi turne dasturini yakunlagandan so‘ng, karyerasidan uzoq vaqtga tanaffus qilishni rejalashtirayotganini aytdi.
Germaniyning Myunxen shahrida bo‘lib o‘tadigan 10 kunlik konsert dasturidan avval mahalliy OAVga bergan intervyusida “Men butunlay holdan toyganman”, dedi yulduz.
“Musiqa sohasida yangiliklar qilish bo‘yicha hech qanday rejalarim yo‘q. Barcha gastrol konsertlarim tugagach, katta tanaffus qilmoqchiman. Hech bo‘lmaganda bir muddat boshqa ijodiy ishlar bilan shug‘ullanish niyatidaman”, dedi Adel.
“Bilasizmi, men hatto uyda ham qo‘shiq aytmay qo‘ydim. G‘alati, shunday emasmi?”, deya tan oldi xonanda.
Adelning so‘nggi albomi 2021-yilda chiqqan. Ikki yil davomida u Las Vegasda dam olish kunlarida konsert o‘tkazib kelmoqda va yaqinda Caesars Palace ko‘ngilochar markazida o‘zining 90-sonli shousini o‘tkazdi. Dastur noyabr oyida tugaydi va Adelning aytishicha, bunday uzoq muddatli gastrollar xonandani har tomonlama charchatgan.
“Juda asabiy bo‘lib qolganman”
Iyun oyida Adel konsertlaridan birida “Pride sucks” (kontekstda “Gey paradlari yomon” deb talqin qilish mumkin) deb baqirgan tomoshabinni jahl bilan haqoratladi.
“Siz mening konsertimga faqat shu so‘zlarni aytgani keldingizmi?” deya Adel tomoshabinlarga yuzlandi.
Ma’lumki, xonanda LGBT hamjamiyatini faol qo‘llab-quvvatlaydigan yulduzlardan biridir.
“Agar aytadigan yaxshi so‘zingiz bo‘lmasa, jim turing, tushundingizmi?” dedi u va shouni davom ettirdi.
Voqea guvohi bo‘lgan ayrim tomoshabinlar so‘zlariga ko‘ra, olomon orasidan bir kishi uning band bo‘lgan ish tartibi haqidagi avvalgi izohlariga javoban “Work sucks”, ya’ni “Ish yomon” deya hayqirgan.
Jurnalistlar ushbu voqea haqida xonandani so‘roqqa tutganda, Adel o‘z jahlini tiyishda juda qiynalishini tan oldi:
“Juda ko‘p narsa mening asabimni buzadi”, dedi u ZDF nashriga. “Men 36 ga kirdim, qarib qoldim. Qolaversa, o‘ta janjalkash ayolga aylandim”, deya qo‘shimcha qildi yulduz.
Uning Germaniyadagi konsertlari Las Vegasdagi shoularidan butunlay farq qiladi. Ushbu konsert uchun ajratilgan maydon 4 mingga yaqin tomoshabinni o‘ziga sig‘diradi. Shuningdek, tadbir o‘tkaziladigan joyda “Adel parki” tashkil etiladi.
Adelning aytishicha, u musiqadan tanaffus qilishni istashining sabablaridan biri bu doimiy diqqat markazida bo‘lishning qiyinligidir.
“Mashhur bo‘lgunimga qadar o‘tgan hayot tarzimni sog‘indim. Ayniqsa, meni hech kim tanimagan paytlarni. To‘g‘ri, endilikda men sevgan ishim — musiqa bilan istagan vaqtim shug‘ullana olaman va qo‘shiqlarim ko‘plab insonlarga manzur bo‘lmoqda. Ammo mashhurlikni yomon ko‘raman”, dedi Adel.
Izoh (0)