Bangladeshdagi ommaviy tartibsizliklarda halok bo‘lganlar soni 17 nafarga yetdi. Bu haqda mamlakatdagi manbalarga tayanib, Al Jazeera nashri xabar berdi.
Manbada aytilishicha, davlat xizmatiga yollashning yangi ishlab chiqilgan qoidalari va ular asosida shakllantirilgan tizim fuqarolar orasida noroziliklar keltirib chiqargan. Oqibatda minglab talabalar poytaxt ko‘chalarida namoyishga chiqqan.
Talabalar noroziligi politsiya bilan to‘qnashgan. Hukumatning noroziliklarni zudlik bilan bostirish qaroridan so‘ng o‘zaro kuch ishlatish holati yuzaga kelgan. Ko‘plab hududlarda politsiya talabalarga o‘q uzgani xabar qilingan.
Bangladesh hukumati davlat xizmatini yollash kvotasiga qarshi norozilik namoyishlarini bostirish uchun baʼzi mobil internet xizmatlarini to‘xtatgani maʼlum qilingan. Internet o‘chirilganiga qaramay poytaxt Dakkada tayoq va toshlar bilan qurollangan minglab talabalar noroziligi davom etgan.
Poytaxt Dakkada va janubi-sharqda joylashgan Narayanganj shahrida noroziliklar ayniqsa avj olgan. Namoyishchilar yo‘llarni barrikadalar bilan to‘sib, politsiya harakatlanishiga qarshilik qilgan.
Mamlakat sharqidagi Chittagong shahrida ham favqulodda vaziyat eʼlon qilingan. Aholidan bitta hududda to‘planmaslik, davlat muassasalariga yaqinlashmaslik so‘ralgan.
Guvohlarning Reuters axborot agentligiga maʼlum qilishicha, politsiya Dakkada transport vositalari, politsiya bo‘limlari va boshqa muassasalarni yoqib yuborgan namoyishchilarni to‘xtatish uchun ko‘zdan yosh oqizuvchi gaz va rezina o‘qlar ishlatgan.
Axborot texnologiyalari vaziri Zunayd Ahmad Palakning mobil internet ijtimoiy tarmoqlardagi “beqaror vaziyat” tufayli vaqtinchalik to‘xtatilganini bildirgan. Vaziyat normal holatga qaytganidan keyin xizmatlar tiklanishi aytilgan.
Maʼlumot o‘rnida, namoyishchilar Bangladeshda 1971-yili bo‘lib o‘tgan mustaqillik urushida qatnashgan faxriylarning oila aʼzolari uchun davlat ish o‘rinlarining 30 foizigacha bo‘lgan kvotalar tizimini bekor qilishni talab qilmoqda. Hukumatning bu masalani ko‘rib chiqishni paysalga solishi g‘alayonlar boshlanishiga sabab bo‘lgan.
Izoh (0)