Ijtimoiy tarmoqlarda Izboskan tumani hokimligiga tegishli bo‘lgan xizmat mashinasida miltillovchi chiroq moslamasi o‘rnatilgani aks etgan videolavha tarqaldi. Viloyat hokimligi holatga izoh berdi.
Unga ko‘ra, ushbu vaziyat tegishli tartibda yaqindan o‘rganilmoqda. Hozirdagi aniq ma’lumotlarga ko‘ra, ushbu tasvir avtomobillarga bezaklash xizmati ko‘rsatuvchi tadbirkorlik subyekti hududida, avtomashinani sozlash jarayonlarida olingan.
Xizmat mashinasi haydovchisi bu qurilmani o‘rnatish uchun tarmoq orqali tasvirli ko‘rinish yuborib, ma’sul shaxsdan bu uchun ruxsat so‘ragan va darhol uni olib tashlash haqida ko‘rsatma olgan. Shu vaqtning o‘zida sinov tariqasida o‘rnatilgan chiroqlar qaytarib chiqarilgan.
Keyinroq esa, olingan ana shu lavhani xizmat ko‘rsatuvchi sub’yekt egalari reklama sifatida o‘z do‘konlarining ijtimoiy tarmoqdagi sahifalariga joylagan. Bu esa, jamoatchilik muhokamasiga sabab bo‘lmoqda.
Ayni vaqtda haydovchiga tegishli tartibda ogohlantirish berildi. Shuningdek, xizmat ko‘rsatishning belgilangan tartiblari, reklama qoidalari bo‘yicha tadbirkorga qo‘shimcha tushuntirish ishlari olib borilmoqda.
Izoh (0)