Raqobatni rivojlantirish va isteʼmolchilar huquqlarini himoya qilish qo‘mitasi Sirdaryo viloyati Avtomobil yo‘llari boshqarmasi tizim tashkilotlariga nisbatan ish qo‘zg‘atdi.
Qo‘mita matbuot xizmatining ma’lum qilishicha, Sirdaryo viloyati Avtomobil yo‘llari boshqarmasi tizim tashkilotlarida “Raqobat to‘g‘risida”gi va “Davlat xaridlari to‘g‘risida”gi qonunlar hamda sohaga oid boshqa me’yoriy hujjatlar ijrosi yuzasidan 2024-yilning mart-iyul oylarida o‘rganish ishlari o‘tkazildi.
O‘rganishlar natijasida mazkur boshqarmaning tizim tashkilotlari: Boyovut, Oqoltin, Sayxunobod, Sirdaryo, Xovos va Guliston tumanlarida joylashgan unitar korxonalari tomonidan o‘tkazilgan boshlang‘ich qiymati 37 milliard so‘mdan ortiq bo‘lgan 67 ta xaridlarda “Raqobat to‘g‘risida”gi hamda “Davlat xaridlari to‘g‘risida”gi qonun talablari buzilgani aniqlandi.
Jumladan, ushbu o‘tkazilgan davlat xaridlarida “Davlat xaridlari to‘g‘risida”gi qonunda belgilangan dastlabki malaka tanlovi, xarid qilish tartib-taomili, tanlashni o‘tkazish talablari buzilishiga yo‘l qo‘yilgan. Shuningdek, “Raqobat to‘g‘risida”gi qonunda belgilangan savdolarda raqobatni cheklashga olib keladigan yoki olib kelishi mumkin bo‘lgan harakatlar sodir etilgan.
Qayd etilishicha, aniqlangan qonun buzilishi holatlari yuzasidan hududiy boshqarma tomonidan Sirdaryo viloyati Avtomobil yo‘llari boshqarmasi tizim tashkilotlariga nisbatan tegishli tartibda ish qo‘zg‘atilib, bajarilishi majburiy bo‘lgan ko‘rsatmalar berildi.
Izoh (0)