Demokratlar partiyasining bir qancha yuqori martabali shaxslari ma’lum qilishicha, AQSH prezidenti Jo Bayden shu dam olish kunlaridayoq prezidentlik poygasidan chiqishi mumkin. Bu haqida Axios xabar qildi.
Bunga Jo Baydenga nisbatan kuchayib borayotgan bosim sabab bo‘lishi mumkin. Iyun oyida bo‘lgan debatda Tramp Jo Bayden ustidan g‘alaba qozongani qayd etilgandi. O‘sha debatda Bayden ancha sust va tushkun ko‘ringandi. Keyinchalik uning o‘zi bu holatni kasalligiga yo‘ydi.
Nima bo‘lishidan qat’i nazar, Jo Bayden prezidentlik poygasini tark etmasligini maʼlum qilgandi.
Biroq endi vaziyat o‘zgardi. Vaqt o‘tgan sari Bayden prezidentlik kabi katta mas’uliyat talab qilinadigan lavozimga loyiqligi borasida savollar ko‘paymoqda. Uning o‘zi ham bir qator uchrashuvlar va tadbirlardagi harakatlari bilan buni isbotlab qo‘ymoqda.
Jumladan, Vashingtonda o‘tgan NATO sammitida Bayden Zelenskiyga so‘z beraman deb, uni “Putin” deb atab yuborgandi.
Qolaversa, bugun 18-iyul kuni Jo Bayden koronavirusga chalingani xabar qilindi.
Izoh (0)