Samarqandda 13 yashar bola Damas’da oyog‘i zanjir bilan kishanlangan holda topilgandi. Maktab o‘quvchisining oyog‘ini zanjirlagan erkakka sud hukmi o‘qildi.
2011-yilda tug‘ilgan SH.SH Paxtachi tumani Qalqon-jasorat harbiy sport maktabining 6-sinfida o‘qiydi. SH.SH.ning vasiylari J.S. va E.M. mazkur maktab o‘qituvchisi X.SH.ni chaqirib, xulqi og‘irligi tufayli bolani Samarqand viloyati Voyaga yetmaganlarga ijtimoiy huquqiy yordam ko‘rsatish markaziga olib borishni so‘ragan.
2024-yil 15-mart kuni maktab o‘qituvchisi SH.X. voyaga yetmagan SH.SH. go‘yoki avtomashinadan tushib qochib ketmasin, degan vaj bilan Damas’ning orqa o‘rindig‘ida g‘ayriqonuniy tarzda bola oyoqlarini temir zanjir bilan bog‘lab qo‘ygan.
Holat yuzasidan Samarqand shahri bo‘yicha IIO FMB tomonidan tergovga qadar tekshiruv olib borilib, Jinoyat kodeksining 138-moddasi (zo‘rlik ishlatib g‘ayriqonuniy ravishda ozodlikdan mahrum qilish) bilan jinoyat ishi qo‘zg‘atilgan edi.
Jinoyat ishlari bo‘yicha Paxtachi tuman sudida holat yuzasidan sud majlisi bo‘lib o‘tdi. Sud hukmiga ko‘ra, sudlanuvchi SH.X. Jinoyat kodeksining 110-moddasi 2-qismi “a” bandi, 138-moddasi 2-qismi “a” bandi bilan aybli deb topilib, 4 yilga ozodlikdan mahrum qilish jazosi tayinlandi.
Izoh (0)