Qozog‘iston energetika vaziri Almasadam Satkaliyev Rossiya gazini ichki bozorga yetkazib berish shartlarini o‘rganish davom etayotganini, gaz uchun narxlar arzon bo‘lmasligini aytdi. Bu haqda “Izvestiya” xabar berdi.
“Vazirlik tomonidan shimoliy va sharqiy hududlarni gazlashtirishning ikki varianti ishlab chiqilmoqda”, dedi u.
Variantlardan biri — “Sariarka” magistral gaz quvurining ikkinchi va uchinchi bosqichlarini qurishni davom ettirish orqali Oqmo‘la va Shimoliy Qozog‘iston viloyatlarini gazlashtirish.
“Bu loyihani ‘Beyneu — Bozoy — Chimkent’ magistral gaz quvurining ikkinchi tarmog‘i qurilgandan so‘ng amalga oshirish mumkin bo‘ladi. Bugungi kunda texnik-iqtisodiy asoslash ishlab chiqilmoqda. Qatarlik investor bilan loyihani birgalikda amalga oshirish bo‘yicha kelishuv mavjud”, dedi vazir.
Ikkinchi variant sifatida Rossiyadan gaz yetkazib berish imkoniyati ko‘rib chiqilmoqda.
“Hozirda QazaqGaz va ‘Gazprom’ o‘rtasida Qozog‘istonning shimoliy va sharqiy hududlariga gaz yetkazib berish shartlari muhokama qilinmoqda”, dedi Satkaliyev.
Vazirning so‘zlariga ko‘ra, muzokaralar yakunlangach, iqtisodiy va texnik jihatlarni hisobga olgan holda shimoliy va sharqiy hududlarni gazlashtirishning maqbul varianti tanlanadi.
2023-yil iyun oyida Qozog‘iston energetika vaziri mamlakat sharqida ichki resurslar hisobiga gazlashtirish faqat 2027—2028-yillardan keyin amalga oshirilishi mumkinligini, yaqin istiqbol uchun esa Rossiyadan gaz import qilinishi kerakligini aytgandi. Shu bilan birga, u Rossiya gazi arzon bo‘lmasligini ta’kidlagan.
Izoh (0)