Qirg‘izistonda O‘zbekistondan kelgan qurilish mutaxassislariga mahalliy kadrlarga qaraganda 50 foizga kam maosh to‘lanmoqda. Bu haqda qirg‘izistonlik professor bergan maʼlumotga asoslanib, “Tazabek.kg” nashri xabar berdi.
Qirg‘iziston iqtisod fanlari doktori, professor Azisbek Beksultanov “Birinchi radio” nashriga bergan intervyusida mahalliy va xorijiy ishchilarga to‘lanayotgan haq borasida fikr bildirib, O‘zbekistonlik ishchilar nisbatan kam haq evaziga ishlayotgani haqida gapirib o‘tgan.
Professorning so‘zlariga ko‘ra, so‘nggi yillarda Qirg‘izistonda o‘zbekistonlik quruvchilar soni sezilarli darajada ko‘paygan. Ishchilar asosan Farg‘ona vodiysiga tutash Qirg‘iziston tumanlariga borib qurilish ishlarida qatnashgan.
“Ko‘pchilik taʼkidlaganidek, ularning ishlari yuqori sifatli va estetik did bilan qilingan, biroq o‘zbekistonliklarga to‘lanadigan maosh ancha past. Masalan, shartnomaga ko‘ra, Qirg‘izistonda mahalliy ishchilarga 20 ming so‘m, o‘zbek ustalariga esa bor-yo‘g‘i 10 ming so‘m maosh to‘lanadi, bu 50 foizga arzon degani”, degan Azis Beksultanov.
Professor, shuningdek, mavsumiy turizm faol rivojlanayotganini qayd etgan. Farg‘ona vodiysi bo‘ylab Qirg‘iziston va O‘zbekiston turizm kompaniyalari tur-paketlar tashkil etayotgani aytilgan.
“Martdan to kech kuzgacha sayyohlik kompaniyalari Qirg‘izistonda O‘zbekistonni faol reklama qilmoqda. Bu ikki davlat iqtisodiyotiga ijobiy taʼsir ko‘rsatmoqda. Birinchidan, fuqarolarimiz — sayohatchilarimiz O‘zbekiston iqtisodini qo‘llab-quvvatlasa, ikkinchidan, ularni jo‘natayotgan turizm kompaniyalari davlat byudjetiga soliq to‘laydi, bu ham xalqimizga, ham mamlakat iqtisodiyotiga foyda keltiradi”, degan professor.
Izoh (0)