Bugun e’tiboringizga hissiyotlarga to‘la va ta’sirli hind filmlarni taqdim etmoqchimiz. Ularda insoniy munosabatlar, turli qiyinchiliklar va to‘siqlarni mardonavor yengish hamda bir-birini qo‘llash kabi mavzular go‘zal tarzda yoritib berilgan.
“O‘tkinchi dunyo” (2003)
Rejissyor Nikhil Advani tomonidan suratga olingan ushbu filmda haqiqiy sevgini topish yo‘lida sanoqsiz to‘siq va kurashlarga duch kelgan juftlik tasvirlangan. Voqealar megapolis shahar — Nyu Yorkda bo‘lib o‘tadi. Filmda bosh rollarni Shohruh Xon, Priti Zinta, Saif Ali Xon va boshqa aktyorlar ijro etgan.
Film yosh bo‘lsa-da, qalbi dardga to‘la Naina tomonidan hikoya qilinadi, qiz quvnoq va g‘am-tashvishsiz Amanni uchratgandan so‘ng uning hayoti o‘zgarib ketadi. Ularning rishtalari kuchaygani sari, Nainaning hayotiga ham baxt va ijobiy hislar kirib keladi. Biroq voqealarning fojiali burilishi ularning muhabbatini katta sinovdan o‘tkazadi. Film fidoyilik va hayotning har bir lahzasidan to‘liq bahramand bo‘lish muhimligi kabi tushunchalarni o‘rgatadi.
Hayot zerikarli bo‘lishi mumkin emas (2011)
Film iste’dodli rejissyor Zoya Axtar tomonidan yaratilgan. Unda Kabir (Abhay Deol), Imron (Farxan Axtar) va Arjun (Ritik Roshan) hayotda turli omadsizlik va bir-biri bilan ko‘ngilsizliklarni boshdan kechirgan do‘stlarni ijro etadi. Kabir to‘yiga ikki oy qolganda uzoq yillardan beri ko‘rishmagan qadrdon sinfdoshlari bilan Ispaniyaga sayohatga yo‘l oladi.
Imron bir necha yillardan beri Ispaniyada yashab kelayotgan biologik otasini topishga yashirincha umid qilgan bo‘ladi. Arjun esa dastlab sayohat haqidagi fikrga qarshilik qiladi, chunki u bir muddatga ham katta daromadli ishini tark eta olmaydi. Yigitlar Ispaniyada ularning har biri ishtirok etadigan 3 xil tadbir tashkil qilishi kerak bo‘ladi. Filmda Ispaniyaning go‘zal manzarasi, madaniyati va an’analari ham o‘rin olgan.
Piku (2015)
Rejissyor Shudjit Sirkar tomonidan suratga olingan filmda ota va uning qizi o‘rtasidagi munosabatlar mavzusi ko‘tariladi. Unda voyaga yetgan Piku va rafiqasidan ajralib, qaysar bo‘lib qolgan otasi o‘rtasidagi munosabatlarning turli bosqichlari tasvirlanadi. Film tomoshabinlarga insoniy munosabatlarning muhimligi va qiyin paytlarda biz doimo oilaga murojaat qilishimiz kerakligini o‘rgatadi.
Bosh rollarni taniqli aktyorlar Amitabh Bachchan va Dipika Padukone ijro etgan. Filmda shimolda yashovchi ko‘plab hindlarning oddiy hayoti, Dehli madaniyati hamda Kalkutta aholisi yashash tarzi ko‘rsatib berilgan.
“Rokki va Rani. Sevgi hikoyasi” (2023)
Film premyerasi 2023-yilda bo‘lib o‘tdi, unga Karan Johar rejissyorlik qildi. Ranvir Singx o‘zining qattiqqo‘l buvisi Janalakshmi Randxava tomonidan asos solingan va otasi Tijori tomonidan boshqariladigan shirinliklar ishlab chiqaruvchi kompaniyasining merosxo‘ri — Rokki rolini ijro etadi. Rokki otasiga umuman o‘xshamaydi: u doim yorqin, naqshli kiyimlarda yurishni yaxshi ko‘radi, ingliz tilida mujmal gapiradi.
Rokki harakat va xotira bilan bog‘liq muammolari bo‘lgan bobosi Kanvalni juda yaxshi ko‘radi. Bir kuni Kanval bobo “Jamini” ismini aytib, bir ayolning yirtilgan va eski fotosuratini nabirasiga ko‘rsatadi. Shundan so‘ng Rokki o‘sha ayolni izlab topishga qaror qiladi.
Jamini Kanvalning sobiq sevgilisi bo‘lib chiqadi. Rokki Jaminining nabirasi Rani bilan tanishib, keksa juftlik o‘rtasidagi yashirin uchrashuvlarni tashkil qiladi. Bu orada Rokki Jaminining nabirasiga ko‘ngil qo‘yadi.
Izoh (0)