O‘zbekistonda 2024-yilning dastlabki olti oyida mahalliylashtirish dasturi doirasida ishlab chiqarish 34 foizga o‘sdi. Bu haqda prezident raisligida o‘tayotgan videoselektor yig‘ilishida ma’lum qilindi.
Lekin hamma tarmoq yoki hududda ham ishlar bir xil emasligi qayd etildi. Davlat xaridida mahalliy mahsulotlar ulushi 78 foizni tashkil qilsa-da, ayrim vazirliklarda o‘zimizda bor mahsulotni import qilish holatlari hanuzgacha davom etayotgani tanqid qilindi.
Shu bois mahalliylashtirish bo‘yicha ishlar yangicha tizim asosida tashkil qilinadi. Har oyda eng ko‘p import bo‘layotgan isteʼmol tovarlari ro‘yxati va hajmi tadbirkorlarga eʼlon qilib boriladi. Raqobat qo‘mitasi hudud va tarmoq kesimida o‘rganib, bozorda yetishmayotgan mahsulotlar bo‘yicha yangi quvvatlarni yaratish va mavjudlarini kengaytirish bo‘yicha takliflarini beradi. Ushbu takliflar asosida aniq loyihalar paketi shakllantiriladi, ular 20 ta yirik tarmoq quvvatlarida yoki hududiy korxonalar bilan kooperatsiya asosida amalga oshiriladi.
Bu yangi tizimni joriy qilish uchun Hukumatda mahalliylashtirish bo‘yicha alohida tuzilma tashkil qilinadi. Umuman, 2024-yilda 92 trillion so‘mlik mahsulotni mahalliylashtirish zarurligi ko‘rsatib o‘tildi.
Shuningdek, vazirlik, idoralar va hokimliklarning Kooperatsiya portalidagi ishtiroki yetarli emasligi qayd etildi. 63 mingta mahalliy korxonadan atigi 5 foizi mahsulotini portalga chiqarmoqda.
Mutasaddilarga yil yakuniga qadar barcha hududiy sanoat korxonalarini portalga to‘liq ulash topshirildi. Mahalliy mahsulotlar uchun 520 ta milliy standartni ishlab chiqish zarurligi taʼkidlandi.
Eksport masalalari tahlil qilinar ekan, tarmoq va hududlar yil boshidan 8,7 milliard dollarlik mahsulotini chetga sotgani taʼkidlandi. Lekin 9 ta tumanda eksport o‘tgan yilgi ko‘rsatkichning yarmiga ham yetmagan.
Yana bir masala – xorijiy davlatlar ichki bozorini himoya qilish uchun ko‘plab tarif va notarif to‘siqlarni belgilamoqda. Tashqi ishlar vazirligi va boshqa manfaatdor idoralarga ushbu to‘siqlarni yumshatish yuzasidan muzokara o‘tkazib, kelishuvga erishish topshirildi.
Avvalroq mutasaddilarga yil yakunigacha 10 trillion so‘mlik asossiz xarajatlarni maqbullashtirish choralarini ko‘rish topshirilgani, Shavkat Mirziyoyev investitsiya hisobiga tashkil etilgan ayrim korxonalar hozirda ishlamayotganini tanqid qilgani to‘g‘risida xabar berilgandi.
Izoh (0)