Qozog‘iston hukumati mamlakat hududida bir nechta atom elektr stansiyalarini qurish imkoniyatlarini ko‘rib chiqmoqda. Bu haqda Qozog‘iston energetika vaziri Almasadam Satkaliyev bergan maʼlumotga asoslanib, AKI Press manbasi xabar berdi.
Qozog‘istonda bir nechta AESlar qurish masalasi 16-iyul kuni OAV vakillari uchun bo‘lib o‘tgan brifingda maʼlum qilingan. Uchrashuvda Energetika vazirligi rasmiylari qatnashib, yadro dasturi borasidagi kun tarkibini qisman ochiqlagan.
“Energetika vazirligi referendum (Qozog‘istonda atom elektr stansiyasi qurish bo‘yicha) haqida gapirar ekan, Qozog‘istonda faqat bitta atom elektr stansiyasi qurishni taklif qilmayapti: gap atom energetikasini rivojlantirish haqida ketmoqda. Atom energetikasi — bu atom sanoatining bir qismidir”, degan mamlakat vaziri brifingda.
Satkaliyev kelgusida ishonchli va kengaytiriladigan energiya taʼminotini taʼminlash uchun mamlakatda yangi atom elektr stansiyalarini qurish dolzarb ekanligini bildirgan. Bu loyihalarni amalga oshirish uchun uchta yirik qurilish maydoni tayyorlanayotgani xabar qilingan.
“Yirik va kichik quvvatli stansiyalar nuqtayi nazaridan Balxash poligonini alohida taʼkidlash joiz. Bundan tashqari, Kurchatov poligoni, shuningdek, ilgari Qozog‘istonning g‘arbiy qismida o‘rta quvvatli zavod joylashgan hudud bor. Bu uch inshoot kelgusidagi yadroviy loyihalarda foydalaniladi” deya maʼlumot bergan Qozog‘iston rasmiysi.
O‘tgan yili Qozog‘iston Energetika vazirligi atom elektr stansiyasi qurilishi bo‘yicha kelishuvga erishilsa, Olmaota viloyatining Jambil tumanidagi Ulken qishlog‘ida platformani qurish boshlanishi mumkinligini aytgan edi.
“Global miqyosda ko‘mirdan foydalanish bo‘yicha jiddiy cheklovlarga duch kelinmoqda. Bunday holda gaz birinchi navbatdagi yoqilg‘i sifatida ishlatiladi. Shuning uchun hozircha bizda muqobil variantlar kam”, degan Satkaliyev.
Qozog‘istonga bir necha mamlakatlardan yadroviy hamkorlik bo‘yicha takliflar tushgan. Xususan, HPR-1000 reaktoriga ega Xitoyning CNNC kompaniyasi, APR-1400 reaktoriga ega Janubiy Koreyaning KHNP kompaniyasi, VVER-1200 va VVER-1000 reaktorlariga ega Rossiyaning Rosatom va EPR-1200 reaktoriga ega Fransiyaning EDF kompaniyalari Astanaga taklif yuborib, sheriklik taklif qilgan.
Shuningdek, Qozog‘iston hukumati NuScale (AQSH), GE-Hitachi (AQSH—Yaponiya) kabi texnologiya “gigantlari” va yetkazib beruvchilarining murojaatlarini o‘rganib chiqayotgani bildirilgan.
Manbaga ko‘ra, hozirgi paytda Qozog‘iston uchun loyihadagi bitta AESni qurish xarajatlari o‘rtacha 10-12 milliard dollarga baholanmoqda.
Izoh (0)