Qozog‘istonning Shimkent shahrida uch kishi Kongo-Qrim gemorragik isitmasi bilan kasallandi, ulardan biri vafot etdi. Bu haqda “Otyrar” xabar berdi.
Ma’lum qilinishicha, bemorlarning 2 nafari yuqumli kasalliklar shifoxonasida davolanib, uyiga javob berilgan. Sayram tumanida yashovchi 61 yoshli fuqaro esa o‘ta og‘ir ahvolda reanimatsiyaga yotqizilgan va u yerda uch kun yotib, kerakli davolanishni olgan. Shifokorlarning sa’y-harakatlariga qaramay, erkak hushiga kelolmay vafot etgan.
Hozirda yana bir bemor gumon ostida, uning Kongo-Qrim gemorragik isitmasi bo‘yicha tahlillari mutaxassislar tomonidan tekshirilmoqda.
Kongo-Qrim gemorragik isitmasining asosiy tashuvchisi iksod kanalaridir. Kanalar issiq qonli hayvonlar va havo harorati isishi bilan odamlarga hujum qiladi. Kana chaqish mavsumi martdan iyungacha va kuzda sentyabrdan oktyabrgacha davom etadi.
Kasallikdan himoyalanish bo‘yicha 5 ta maslahat
- Kana bilan aloqa qilishdan saqlaning: infeksiyalangan kana chaqishi orqali kasallik uzatiladi. Shuning uchun kana tez-tez uchraydigan joylarda ehtiyot choralarini ko‘rish kerak.
- Ochiq havoda bo‘lganingizdan keyin kiyimingizni tekshiring: kiymingizdan kana topilsa, uni maxsus pinsetlar yoki boshqa vositalar yordamida imkon qadar tezroq olib tashlash kerak.
- Infeksiyalangan hayvonlar va ularning qoni bilan aloqa qilishdan saqlaning: virus hayvonlarning to‘qimalari bilan aloqa qilish orqali yuqishi mumkin. Shu sababli kasal hayvonlar bilan aloqa qilishdan qochish kerak
- Gigiyena choralariga rioya qiling: Qo'lingizni muntazam ravishda sovun bilan yuvish infeksiya tarqalishining oldini olish uchun muhim qadamdir.
- Simptomlardan ogoh bo‘ling: isitma, bosh og‘rig‘i, mushak og‘rig‘i, ko‘ngil aynishi, qusish va qon ketishi kabi belgilar paydo bo‘lsa, darhol shifokorga murojaat qiling. Kasallikni erta aniqlash va davolash sog‘ayish imkoniyatini sezilarli darajada oshiradi.
Izoh (0)