Qoraqalpog‘iston Respublikasining Bo‘zatov, Samarqand shahri hamda Navoiy viloyatining Karmana tumanida valyuta ayirboshlash bilan shug‘ullanib kelgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Bo‘zatov tuman bo‘limi va IIB xodimlari hamkorligida “Mang‘it dehqon bozori” MCHJ oldida o‘tkazilgan tezkor tadbirda valyuta ayirboshlash bilan shug‘ullanib kelgan A.A. va boshqalar fuqaro M.X.dan 2 800 dollarni 35,1 mln so‘mga sotib olgan vaqtida ushlanib, uning yonidan 3 200 dollar, 6 400 rubl hamda 369 mln so‘m ashyoviy dalil sifatida olingan.
Shu kabi departamentning Samarqand viloyat boshqarmasi tomonidan Samarqand shahri “O‘rta Xo‘jasoat” MFY hududida o‘tkazilgan tezkor tadbirda valyuta ayirboshlash bilan shug‘ullanib kelgan K.H. fuqaro A.A.ga jami 3 500 dollarni 44,2 mln so‘mga sotgan vaqtida ashyoviy dalillar bilan ushlangan.
Departamentning Karmana tuman bo‘limi tomonidan o‘tkazilgan tezkor tadbirda valyuta ayirboshlash bilan shug‘ullanib kelgan S.G‘. fuqarolar A.D. va U.Sh.ga jami 3 150 dollarni 40 mln so‘mga sotishga kelishib, shundan 2 ming dollarni bergan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)