Keniya politsiyasi 15-iyul kuni 42 nafar ayolni o‘ldirgan seriyali qotilni hibsga olgan. Bu haqda politsiya matbuot xizmati tarqatgan xabarga asoslanib, CNN nashri xabar berdi.
33 yoshli Kollins Jumaisi Xalusha dushanba kuni Keniya poytaxti Nayrobidan sharqda joylashgan Soveto shahrida hibsga olingan. U Yevro-2024 futbol musobaqasi o‘yinini tomosha qilish uchun mahalliy klublardan biriga borganda hibsga olingan.
Keniyaning jinoiy tergov bo‘yicha idorasi direktori Muhammad Amin surishtiruv jarayoni haqida maʼlumot bergan. Unga ko‘ra, Kollins Jumaisi 42 nafar ayolni o‘ldirganini tan olgan.
“So‘roq paytida gumonlanuvchi 2022-yildan 2024-yil 11-iyuligacha bo‘lgan davrda 42 nafar ayolni aldab uyiga olib kelganini, so‘ngra ularni o‘ldirib, burdalangan jasadlarini yo‘q qilgani va axlatxonalarga tashab ketganini tan oldi”, — degan Muhammad Amin.
Politsiya bosh inspektori vazifasini bajaruvchi Duglas Kanja o‘z bayonotida hozirgacha o‘ldirilgan ayollardan faqat 9 tasining tanasi qoldiqlari topilganini aytgan. Ular ekspertizaga topshirilgani va tahlil natijalari kutilayotgani bildirilgan. Yana 33 ta jasad noma’lumligicha qolmoqda.
Kollins Jumaisi Xalusha o‘z jinoyatlarini asosan ijaradagi uyida sodir etgani aniqlangan. Uy omborxonasidan jasad solingan qop va boshqa ashyoviy dalillar ham topilgan.
Politsiya bergan maʼlumotga ko‘ra, seriyali qotilning ilk qurboni uning rafiqasi bo‘lgan. Qotil rafiqasini bo‘g‘ib o‘ldirgan va tanasini qismlarga bo‘lib, shahar atrofidagi axlatxonaga tashlab ketgan.
Dastlabki oltita jasad 12-iyul kuni Nayrobining Mukuru va Njenga hududlarida topilgan. Keniya politsiyasining taʼkidlashicha, jasadlar suv va axlat bilan to‘ldirilgan sobiq qurilish maydoni hududida aniqlangan.
Kollins Jumaisi Xalusha qurbonlarni nega o‘ldirganligi hali to‘liq aniqlanmagan. Rasmiylar uni ruhiy nosog‘lom deb taxmin qilishgan. Uning salomatlik tahlillari hali aniq bo‘lmagani bois sud ham jazo tayinlashni kechiktirishi xabar qilingan.
Seriyali qotilning ikki yil davomida hech qanday to‘siqqa uchramasdan jinoyat sodir etishi tinch aholi orasida xavotirlarni kuchaytirgan. Bir guruh fuqarolar ayollar o‘limi holatlari ko‘payishi ortidan keniyalik ayollarni himoya qilish tizimini kuchaytirishga chaqirgan.
“O‘sha ayollar qotillikda o‘ldirilgan, endi navbatdagi ayol kim bo‘ladi? 42 kishini o‘ldirgan odam mamlakatda erkin harakatlanib yurganligi juda achinarli. Ayollarni himoya qilish kerak va ular ham inson ekanligini inobatga olish kerak”, — degan qonunshunos Lea Sankaire Sopiato qotillikdan so‘ng tashkil etilgan matbuot brifingida.
Faol fuqarolar mamlakat bo‘ylab ayollarga qarshi zo‘ravonlikni oldini olish uchun gender politsiyasi tizimini qayta tiklashga chaqirgan.
Izoh (0)