Anant Ambani va Radhika Merchantning to‘yi yozning eng ko‘p muhokama qilingan voqeasiga aylandi. Ma’lum bo‘lishicha, to‘yni keng miqyosda nishonlash kuyov tomonning oilaviy an’anasi hisoblanadi. Mukesh Ambanining katta farzandlari — Akash va Ishaning hashamatli to‘y bazmlari ukasinikidan qolishmagan.
Qahramonlarimizning ota-onalari Mukesh va Nita Ambani 1985-yilda turmush qurgan, lekin ular ancha vaqtgacha farzandli bo‘lisholmaydi. Olti yil o‘tgach, 1991-yil 23-oktyabrda Mukesh va Nitaning egizak farzandlari tug‘iladi — o‘g‘li Akash va qizi Isha.
Akash Mumbaydagi xalqaro maktabda tahsil oladi, keyin esa AQSHdagi Braun universitetida oliy ma’lumotni davom ettiradi — u yerda iqtisod bo‘yicha o‘qiydi. 2014-yilda diplomini olgach, o‘sha yiliyoq oilaviy biznesga qo‘shiladi.
2019-yil mart oyida Akash hindistonlik taniqli tadbirkor Rassel Mehtaning qizi Shloka Mehtaga uylanadi. Qaynotasi chakana savdo, ommaviy axborot vositalari, ko‘chmas mulk va moliyaviy xizmatlar sohalarida faoliyat yurituvchi kompaniyalarni o‘z ichiga olgan oilaviy konglomeratning boshqaruvchi direktori edi. O‘sha paytda Mehtaning eng yirik ishi — Hindistondagi olmos bozorida yetakchi o‘rinni egallagan zargarlik biznesi bo‘lgan.
Akash bo‘lajak rafiqasi bilan bolaligida tanishgan. Ikkalasi ham Mumbaydagi bitta maktabda o‘qigan. O‘rta ta‘limni tugatgandan so‘ng, Mehta Prinston universitetida o‘qishni davom ettiradi, u erda antropologiya bo‘yicha o‘qiydi, so‘ngra London Iqtisodiyot maktabida huquq va antropologiya bo‘yicha magistrlik darajasini oladi. Ambani o‘quv yilining so‘nggi kunida sevgilisiga turmush qurishni taklif qiladi. Nikoh 2018-yilning mart oyida Goada kelin va kuyovning oila a’zolari ishtirokida bo‘lib o‘tgan.
Bir yil o‘tgach, asosiy to‘y marosimi Mumbaydagi Jio World Center’da bo‘lib o‘tadi. Mehmonlar zalga gullagan yapon sakurasi bilan bezatilgan ulkan arkalar orqali kirishadi, butun maydon gullarga ko‘milgan va markazda Krishnaning ulkan haykali turardi. To‘y xarajatlari oshkor etilmagan, ammo dabdabaga ko‘ra, Mukesh Ambani katta o‘g‘lidan pul ayamagan, deb aytish mumkin.
To‘yda Bollivud yulduzlari, jumladan Priyanka Chopra va Ayshvarya Ray, jahon yetakchilari, jumladan, Buyuk Britaniya sobiq bosh vaziri Toni Bler va uning rafiqasi Cheri Bler, Google bosh direktori Sundar Pichay va uning rafiqasi hamda Netflix asoschisi Rid Xestings ko‘rinish beradi. O‘sha oqshom Kris Martin barchani qo‘shiqlari bilan xushnud etadi.
Bir yil oldin, 2013-yilda esa Yel universitetini psixologiya va Janubiy Osiyoshunoslik yo‘nalishi bo‘yicha tamomlagan Ishaning to‘yi bo‘lib o‘tgandi. Uning turmush o‘rtog‘i milliarder Ajay Piramalning o‘g‘li Anand edi. Bu juftlik ham bir-birini bolalikdan tanigan, ammo ular faqat 2016-yilda uchrasha boshlagan. Ikki yil o‘tgach, Anand turmush qurishni taklif qiladi. To‘y marosimlari deyarli bir hafta davom etadi va turli joylarda bo‘lib o‘tadi: Udaypur, Italiyaning Komo ko‘li va Mumbay. Mish-mishlarga ko‘ra, mazkur dabdabali to‘y 100 million dollarga tushgan.
To‘y oqshomida Beyonse mehmonlar, jumladan Nik Jonas va Priyanka Chopra va Hillari Klintonlar oldida chiqish qiladi.
To‘rt yildan so‘ng, 2022-yil 19-noyabrda Isha va Anand egizaklar — Krishna va Aadiyaning ota-onasi bo‘lishadi.
Izoh (0)