“El-yurt umidi” jamg‘armasi stipendiati, Xalqaro energetika huquqi bo‘yicha Buyuk Britaniyaning Liverpul universitetida doktorantura dasturi bo‘yicha taʼlim olayotgan Ixtiyor Ko‘ziyevning farzandlari Angliyaning Nottingem shahrida o‘tkazilgan “Yoshlar bo‘yicha shaxmat musobaqasi” finalida munosib ishtirok etdi. Bu haqda jamg‘arma matbuot xizmati xabar berdi.
Maʼlum qilinishicha, musobaqa yakunlari bo‘yicha Ixtiyor Ko‘ziyevning qizi Nodirabegim Baxtiyorova 16 yoshgacha bo‘lgan qizlar bo‘yicha Angliya chempionligini qo‘lga kiritdi.
Stipendiatning o‘g‘li Komronbek Baxtiyorov esa 14 yoshgacha bo‘lgan o‘smirlar orasida 4-o‘rinni egalladi.
Maʼlumot uchun, shaxmat bo‘yicha Angliya chempionatida ilk marotaba O‘zbekiston bayrog‘i ostida o‘zbekistonlik yosh shaxmatchilar ishtirok etdi.
Assalomu alaykum, aziz yurtdoshlar! Bugungi kunda prezidentimiz Shavkat Mirziyoyev tomonidan vazirlik va idoralarning iqtidorli xodimlarining xorijda taʼlim olishlari uchun yetarli sharoit va imkoniyatlar yaratib berilgan bo‘lib, mazkur vazifalarni moliyalashtirish maqsadida “El-yurt umidi” jamg‘armasi tashkil etilgan. Taʼkidlash lozimki, xorijiy davlatlarning yetakchi taʼlim muassasalariga o‘qishga yuborilgan talabalar yurtimiz nomini munosib targ‘ib qilishmoqda va har bir sohada o‘z iqtidorlarini munosib namoyish qilishmoqda. Hatto farzandlarimiz ham yurtimiz bayrog‘ini baland tutib kelishmoqda. Yurtboshimiz, xalqimiz hamda “El-yurt umidi” jamg‘armasi rahbariyati tomonidan bizga yaratib berilayotgan imkoniyatlardan farzandlarimiz ham unumli foydalanishmoqda.
Nasib bo‘lsa, hali oldimizda ulkan rejalar bor. Dunyoning yetakchi universitetida ilmiy ish qilishimda zarur sharoitlarni yaratib bergani uchun davlatimiz rahbari hamda “El-yurt umidi” jamg‘armasi rahbariyatiga o‘z minnatdorchiligimni bildiraman. Iqtidorli yoshlarning orzularini amalga oshirayotgan “El-yurt umidi” jamg‘armasi stipendiati ekanligimdan faxrlanaman. Barchangizga rahmat!, deydi “El-yurt umidi” jamg‘armasi stipendiati Ixtiyor Ko‘ziyev.
Izoh (0)