1992-yilda katta ekranlarga chiqqan va tez orada mashhur bo‘lgan “Asosiy instinkt” filmi bosh qahramoni Sheron Stoun insultni boshidan o‘tkazganidan keyin barcha boyliklarini yo‘qotdi. Aktrisaning ta’kidlashicha, g‘arazli niyatda bo‘lgan kimsalar uning zaifligidan foydalangan.
2001-yilda Sheron miyasiga qon quyilib, insultga chalindi. U kasalxonada og‘ir ahvolda to‘qqiz kun davomida hushsiz yotdi. Reabilitatsiya va odatiy hayot tarziga qaytish juda uzoq — yetti yil davom etdi. Endilikda Stoun doimiy ravishda dorilar qabul qilib yurishi kerak. Unda xotira bilan bog‘liq muammolar ham kuzatilmoqda.
Aktrisa reabilitatsiyani o‘tkazayotgan vaqtida, ma’lum bo‘lishicha, umri davomida to‘plagan mablag‘lar — hisob raqamidagi 18 million dollar pul g‘oyib bo‘lgan:
“Karyeram orqali orttirgan 18 million dollarim bor edi, lekin bankdagi hisobimni tekshirganimda hammasi g‘oyib bo‘lganini bildim. Mening barcha mol-mulkim, hatto uyimdagi muzlatkichim, telefonim — barchasi boshqa odamlarga tegishli edi”, dedi Stoun Hollywood Reporter nashriga bergan intervyusida.
Sheron Stoun aynan kimlar aktrisaning mulkini o‘zlashtirgani haqida to‘xtalib o‘tirmadi. Aktrisa hayotda ezgulik borligiga ishonch unga omon qolish va tiklanishiga yordam berganini aytdi:
“Men hamma narsani yo‘qotdim. Pullarimni, karyeramni, asrab olgan farzandim uchun vasiylik huquqimni ham qo‘ldan boy berdim. Men hayotimning mazmunini tashkil etgan narsalarni yo‘qotdim. Boy bergan narsalarimning aksar qismini qaytara olmadim, ammo shu onda hayotda shunchaki yashash ham yetarli ekanligini anglamoqdaman”, deydi Stoun.
Izoh (0)