Rossiya uzoq vaqt harbiy amaliyotlar o‘tkaza oladi — Yaponiya

Rossiya sanksiyalarga qaramay uzoq vaqt davomida harbiy amaliyotlar o‘tkazishi mumkin. Bu haqda Yaponiya Mudofaa vazirligining yillik hisoboti — Mudofaa bo‘yicha Oq kitobda e’lon qilindi.

Hisobotda aytilishicha, harbiy sanoatning kechayu kunduz faoliyat yuritishi va boshqa bir qator omillar tufayli Rossiya harbiy qudratini saqlab turibdi.

Hatto sanksiyalar ostida ham Rossiya sobiq Sovet Ittifoqi texnologiyalari darajasida yetarli miqdorda o‘q-dori va qurol ishlab chiqarishni davom ettirishi mumkin. Bu mamlakat uzoq vaqt davomida kurashni davom ettira olishidan dalolat beradi, deyiladi hisobotda.

Hisobotda, shuningdek, Rossiya 2023-yilda harbiy sanoat quvvatini to‘rt barobar oshirishga muvaffaq bo‘lganligi ta’kidlangan.

Shu sababli Yevropa davlatlari va AQSHdan ko‘makni kengaytirish Ukraina uchun yanada muhimroq bo‘lmoqda, deydi Mudofaa vazirligi.

Mudofaa Oq kitobi — bu Yaponiya Mudofaa vazirligining mamlakat mudofaasi nuqtayi nazaridan dunyodagi vaziyat, shuningdek, o‘z-o‘zini mudofaa qilish kuchlarining o‘tgan yildagi faoliyati va asosiy tendensiyalari to‘g‘risidagi yillik hisobotidir. Kitob strategik hujjat emas, balki yil davomida mudofaa sohasidagi o‘zgarishlar va Yaponiya o‘zini-o‘zi mudofaa qilish kuchlari faoliyatining umumiy ko‘rinishidir.