Isroil razvedka xizmati “Mossad” rahbari Devid Barnea HAMAS bilan o‘t ochishni to‘xtatish va asirlar almashinuvi bo‘yicha ehtimoliy kelishuvning birinchi bosqichidan so‘ng G‘azoga hujumlarni davom ettirish tarafdori ekanini aytdi.
Haaretz nashriga ko‘ra, Barnea vazirlar mahkamasi yig‘ilishida ishtirok etib, yig‘ilganlarga mahbuslarni almashish bo‘yicha muzokaralarning borishi haqida ma’lum qilgan.
Mossad direktori bosh vazir Benyamin Netanyaxu singari o‘t ochishni to‘xtatish va mahbuslarni almashish bo‘yicha kelishuvning birinchi bosqichi amalga oshirilgandan so‘ng, Isroil armiyasining G‘azoga hujumlar boshlashini ma’qullagan. Barnea so‘nggi kunlarda G‘azoga hujumlarning kuchayishi mahbuslarni almashish bo‘yicha muzokaralarga “ijobiy ta’sir” ko‘rsatishiga ishonch bildirgan.
Isroil va HAMAS bilvosita muzokaralarda muhokama qilayotgan mahbuslarni almashish bo‘yicha kelishuv taklifi uch bosqichni o‘z ichiga oladi:
- Birinchi bosqich zudlik bilan o‘t ochishni to‘xtatish, ayollar, keksalar va yarador mahbuslarni ozod qilish, falastinlik asirlarni almashish, Isroil qo‘shinlarini G‘azoning aholi punktlaridan olib chiqib ketish, insonparvarlik yordami oqimini ko‘paytirish, asosiy xizmatlarni qayta tiklash, falastinlik tinch aholining G‘azo sektori bo‘ylab o‘z uylariga qaytishini ta’minlashni o‘z ichiga oladi.
- Ikkinchi bosqich inqirozning barqaror yechimiga erishish uchun qolgan barcha mahbuslarni ozod qilish va Isroil qo‘shinlarini G‘azodan butunlay olib chiqib ketishni nazarda tutadi.
- Uchinchi bosqichda bir necha yilga cho‘ziladigan G‘azoni rekonstruksiya qilish rejasini boshlash va halok bo‘lgan mahbuslarning jasadlarini topshirish ilgari surilmoqda.
Izoh (0)