Mamlakatimizda yoz fasli davom etmoqda. Bunday ob-havoda qanday kiyinish, qancha suv ichish va quyosh urishidan saqlanish haqida avvalroq tavsiyalar bergan edik. Bugungi maqolada sog‘liqqa xavf solishi mumkin bo‘lgan yozgi odatlarni eslatib o‘tishni lozim topdik.
Favvoralarda cho‘milmang
Favvoralardagi suv muntazam almashtirilmaydi, chunki ular cho‘milish uchun mo‘ljallanmagan. Yozning issiq havosi esa sun’iy suv havzalarida bakteriyalar va turli mikroorganizmlarning ko‘payishiga sharoit yaratadi. Agar ichak infeksiyalari va turli yuqumli kasalliklarga chalinishni istamasangiz, oila a’zolaringiz, ayniqsa, bolalaringizni favvoralarda cho‘milishdan qaytaring. Favvoralar aslida shahar qiyofasiga ko‘rk qo‘shadigan obidalardan biridir.
O‘tkir ichak kasalliklari va konyunktivit bilan kasallanishdan tashqari favvoralar ichida o‘rnatilgan chiroq, quvur yoki metallga tegib ketib, jiddiy jarohatlar olishingiz mumkin.
Antiperspirantlardan foydalanishni kamaytiring
Issiq havoda organizm terlashi tabiiy jarayondir. Shunday tarzda tana issiqlik almashinuvini tartibga soladi va sizni qizib ketishdan saqlaydi. Agar teri orqali organizmdagi ortiqcha suyuqlikdan xalos bo‘lishiga yo‘l qo‘yilmasa, bu issiqlik urishiga olib kelishi mumkin.
Kechqurun kamroq suv iching
O‘rtacha vaznli inson kuniga ikki-ikki yarim litr suyuqlik ichishi lozim. Mutaxassislar kunlik suv ehtiyojning 80 foizini soat 17:00 ga qadar, qolgan 20 foizini esa soat 21:00 gacha ichishni maslahat beradi. Ma’lum bo‘lishicha, bunday tartib buyraklarga keladigan yukni kamaytiradi va shishlar paydo bo‘lishining oldini oladi.
Sovuq dush qabul qilmang
Ehtimol, sovuq dush o‘zingizni tetik his etishingizga yordam berar, ammo tananing muzlab ketishi va gipotermiya yuzaga kelishi jiddiy oqibatlarga olib kelishi mumkin. Issiq havodan uyga kirib kelgach, tana birdaniga sovuq suvga tushsa, haroratdagi keskin farq shamollash keltirib chiqaradi.
Jazirama havoda ventilyator keraksiz buyumga aylanadi
Xonada o‘ta yuqori harorat bo‘lganda ventilyator salqinlik bermaydi, balki issiq havoni atrofga haydab, vaqtinchalik salqinlik muhitini yaratadi. Bunday texnika odamlarda ko‘ngil aynishi, zaiflik, bosh aylanishi va og‘rig‘iga sabab bo‘ladi. Maxsus suv purkagichli moslamaga ega ventilyator bundan mustasno.
Izoh (0)