AQSH hukumati Isroil rasmiylariga nisbatan G‘arbiy Sohildagi zo‘ravonliklar tufayli sanksiyalar joriy etgan. Bu haqda AQSH hukumat manbalariga tayanib, Reuters nashri xabar berdi.
Sanksiyalar asosan o‘ta o‘ng oqim tarafdori bo‘lgan Isroil rasmiylariga nisbatan kiritilgan. Ular G‘arbiy Sohilning 4 ta hududida noqonuniy yer o‘zlashtirishga ruxsat berish, yahudiy ko‘chmanchilarning Falastinga kirib kelishiga yo‘l qo‘yish va aholiga nisbatan zo‘ravonlik harakatlari sodir etishda aybdor deb topilgan.
Sanksiyalar ro‘yxatida uch nafar Isroil rasmiysi bor. AQSH hukumati Tel-Avivga xabar jo‘natib, Falastin hududlariga ekspansiyani to‘xtatish va zo‘ravonliklar uyushtirish uchun ekstremistlardan foydalanmaslikni so‘ragan.
AQSHni sanksiya kiritishga undagan voqealar G‘arbiy Sohilning Lehava hududida ro‘y bergan. Bu hududda 11-iyul kuni yahudiylarning yahudiy bo‘lmagan mahalliy aholi bilan assimilyatsiya qilinishiga qarshi bo‘lgan va din hamda milliy farqlarni iddao qilib arablarga qarshi tashviqot olib borayotgan isroillik notijorat tashkilot ekspansiya zonasidagi falastinliklarga nisbatan zo‘ravonliklar tashkil etgan. Ularni hududni tashlab ketishga chaqirgan.
Bayden maʼmuriyatining taʼkidlashicha, Lehava guruhi aʼzolari falastinliklarga qarshi avval ham bir necha bor zo‘ravonliklarni amalga oshirgan. Ekstremist guruh asoschisi va rahbari Ben-Sion Gopshteyn avvaldan Qo‘shma Shtatlar qora ro‘yxatida bo‘lgan. Unga nisbatan Britaniya ham cheklovlar kiritgan.
“Qo‘shma Shtatlar G‘arbiy Sohildagi ekstremistlar zo‘ravonligi va Isroilning o‘z xavfsizligiga putur yetkazayotgan beqarorlikdan chuqur xavotirda.
“Biz Isroil hukumatiga ushbu shaxslar va tashkilotlarni javobgarlikka tortish uchun zudlik bilan choralar ko‘rishni qatʼiy tavsiya qilamiz. Bunday qadamlar bo‘lmasa, biz o‘z javobgarlik choralarimizni qo‘llashda davom etamiz”, degan davlat departamenti matbuot kotibi Metyu Miller.
Izoh (0)