O‘zbekistonda ilk bora respublika shaharlarining ekologik barqarorligi reytingi shakllantirildi. Bu haqda 11-iyul kuni Ekologiya vazirligida yashil shaharlar reytingi taqdimotiga bag‘ishlangan matbuot anjumanida ma’lum qilindi, deya xabar bermoqda “Daryo” muxbiri.
Anjumanda Iqlim o‘zgarishi milliy markazi respublikadagi 14 ta ma’muriy markazlarining ekologik reytingini e’lon qildi.
Tasdiqlangan ekologik “master-reja” larni (EMR) amalga oshirish, shuningdek, ko‘rsatkichlarni yaxshilash asosida yiliga bir marta yangilanadigan reyting ma’lumotlariga ko‘ra, Namangan shahri 100 baldan 62,29 ball to‘plagan holda birinchi o‘rinni egalladi. Aholi jon boshiga yashil maydonlar soni bo‘yicha yetakchi – Samarqand 61,13 ball bilan ikkinchi o‘ringa muvaffaq bo‘ldi. Uchinchi o‘rinni 59,50 ball bilan Navoiy shahri egallagan bo‘lib, unda kishi boshiga respublika bo‘ylab iste’mol qilinadigan elektr energiyasining eng kam miqdori to‘g‘ri keladi.
Anjumanda shaharlarning birinchi ekologik “master-reja” taqdimoti bo‘lib o‘tdi. Tajriba sifatida tanlab olingan Buxoro va Samarqand uchun ekologik “master-reja” lar ishlab chiqilgan.
“Master-reja”lar Iqlim o‘zgarishi milliy markazi tomonidan tajriba-sinov shaharlarining hokimliklari hamda ekologiya vazirligining viloyat boshqarmalari bilan hamkorlikda ishlab chiqilgan.
Hujjatlar shaharlar infratuzilmasini va hududiy rejalashtirishni takomillashtirish, energiya samaradorligini oshirish hamda atrof-muhit va tabiiy resurslarga salbiy ta’sirlarni kamaytirish bo‘yicha shahar ma’muriyatlari uchun chora-tadbirlar rejasiga aylanadi.
O‘zbekistonda Green City Index metodologiyasi 7 turdagi ko‘rsatkichlarini o‘z ichiga oladi: havo sifati, yerdan foydalanish, suv iste’moli, transport, energiya, chiqindilar va sanitariya. Ko‘rsatkichlarning deyarli yarmi miqdoriy bo‘lib, rasmiy ma’lumotlarga asoslangan, qayta ishlash darajasi va ifloslantiruvchi moddalar konsentratsiyasi shular jumlasidandir. Shaharning ekologik siyosatini baholash sifat ko‘rsatkichlari hisoblanadi. Shaharlar umumiy reyting va har bir toifadagi individual reytinglar asosida baholanadi.
Ma’lumot uchun:
Ekologik “master reja” — bu atrof-muhitga salbiy ta’sirni minimallashtirish hamda shahar aholisining hayot sifatini yaxshilashga qaratilgan strategik tavsiyalar va harakatlar majmuini o‘zida aks ettiruvchi hujjat.
Izoh (0)