AQSHda huquq-tartibot idoralariga yolg‘on maʼlumot berishda ayblangan o‘zbekistonlik bir oylik qamoq jazosiga hukm qilingan. Bu haqda Konnektikut shtatidagi AQSH advokatlik idorasi rasmiy saytida xabar qilingan.
Manbada aytilishicha, 37 yoshli O‘zbekiston fuqarosi Siddiqjon Mamajonovga nisbatan Nyu-Xeyvendagi okrug sudyasi Viktor A. Bolden tomonidan hukm chiqarilgan. Mamajonov federal huquq-tartibot idoralariga yolg‘on bayonot berganlikda aybdor deb topilgan.
Ayblanuvchi jazo muddatini allaqachon o‘tab chiqqan. Sud hayʼatining umumiy bergan xulosasi va buyrug‘iga mutanosib ravishda Mamajonov yana bir yil davomida kuzatuv va nazorat ostida bo‘ladi.
AQSH prokurori Vanessa Roberts Averi, Adliya departamentining Milliy xavfsizlik bo‘limidan Bosh prokuror yordamchisi Metyu Olsen, Federal tergov byurosining Nyu-Xeyven bo‘limi masʼul maxsus agenti Robert Fuller va ichki xavfsizlik bo‘yicha tergov maxsus agent Maykl Krol ushbu xabarni tasdiqlagan va sudning chiqargan hukmini qo‘llab-quvvatlagan.
Sud jarayonida taqdim etilgan dalillarga ko‘ra, Mamadjonov 2009-yil fevral oyida AQSHga ko‘chib kelgan, Konnektikut shtatining Nyu-Britaniya shahrida yashagan va 2010-yil sentyabrida qonuniy tartibda doimiy rezident bo‘lgan.
2013-yilning 27-mayida Mamadjonov AQSHdan Turkiyaning Istanbul shahriga jo‘nab ketgan. Shu safari davomida u akasi Saidjon Mamadjonov Suriyadagi fuqarolar urushida qatnashib halok bo‘lganini bilib qolgan. Siddiqjon Mamadjonov 2013-yil 11-iyun kuni AQSHga qaytib kelgan. Iyul oyi boshida u ichida iPhone 4 mobil telefoni bo‘lgan DHL paketini qabul qilgan. Telefonda Saidjon Mamajonovning Suriyadagi faoliyati aks etgan bir qancha video va fotosuratlar, jumladan, uning harbiy kiyimda qurol tozalayotgani va o‘limi aks etgan videolar bo‘lgan.
2014-yilda AQSH maxsus agentlari bilan uchta intervyu davomida Mamajonov 2013-yilda Turkiyaga qilgan safari va akasi haqidagi savollarga javob bergan. Mamajonov bir necha bor yolg‘on bayonotlar berib, ukasi Turkiya yoki Dubayda yashayotgani, 2013-yilda Turkiyada bo‘lganida akasi bilan uchrashgani, safardan qaytganidan so‘ng akasi unga jo‘natma jo‘natgani haqida yolg‘on maʼlumotlar taqdim etgan.
2016-yil avgust oyidagi tergovda ham ayblanuvchi akasidan jo‘natma olganini, Saidjonning qayerdaligini bilmasligini, AQSHdagi o‘zbekistonliklarning Suriyaga jang qilish uchun ketayotgani haqidagi gap-so‘zlarni eshitmaganligini va bundan bexabarligini aytgan.
Siddiqjon Mamajonov 2017-yilning 22-dekabrida hibsga olingan. 2023-yil 7-mart kuni sudyalar hayʼati Mamajonovni huquq-tartibot idoralariga yolg‘on bayonot berganlikda aybdor deb topgan.
Joriy yilning 10-iyulida chiqqan bayonot esa Siddiqjon Mamajonovga rasmiy hukm chiqargan.
Izoh (0)