Peru tog‘larida bundan 22 yil muqaddam izsiz yo‘qolgan amerikalik alpinistning jasadi aniqlandi. Bu haqda CNN nashri xabar berdi.
Alpinist Bill Stampfl bundan ancha yillar muqaddam Peruning And tog‘lari bo‘ylab sayohat qilgan. Sayohati davomida u qo‘qqisdan yuz bergan qor ko‘chkisi oqibatida ulkan darada ko‘milib qolgan.
Sobiq alpinistning jasadi 27-iyun kuni aka-uka Rayan Kuper va Uesli Uorenlar tomonidan topilgan. Sayohatchilar Huaskaran tog‘iga safar paytida nomaʼlum jasadga duch kelishgan.
Alpinistning jasadi topilganini uning o‘gli Jozef Stampfl ham tasdiqlagan. Hozirda jasad yaqin atrofdagi shaharlardan birida ekani bildirilgan.
Aka-uka sayohatchilar jasadni Peruning Kordilyera-Blanka tizmasidagi yassi hududda, dengiz sathidan 5 kilometr balandlikda topishganini bildirishgan. Tekis yuzaga nisbatan bo‘rtib chiqqan nomaʼlum jism sayohatchilarning eʼtiborini tortgan. Tekshirib ko‘rilganda u inson tanasi qoldiqlari ekanligi maʼlum bo‘lgan.
Tog‘li hududdagi muz qatlami tufayli jasad yaxshi saqlangan. Bill Stampflning yonidan uning nikoh uzugi, shaxsiy guvohnomasi, kamera, pasport, hamyon va ko‘zoynak ham topilgan.
Maʼlumotlarga ko‘ra, Bill Stampfl va uning ikki hamkasbi Stiv Erskine va Metyu Richardson 2002-yilning 24-iyun kuni Huaskaran tog‘ida qor ko‘chkisi paytida bedarak ketgan. O‘sha paytda alpinist 58 yoshda bo‘lgan. Tog‘li hududda haftalar davomida o‘tkazilgan qidiruv alpinistlarni topishga yordam bermagan.
Alpinist Stampflning jasadi topilgach, u otopsiya qilingan va Perudagi Xuares shahriga olib kelingan. Endilikda jasad poytaxt Limaga olib ketilib, kuydirilishi xabar berilgan. Marhumning xoki esa AQSHga yuboriladi.
Izoh (0)