“Yozda anomal issiq vaqtida yoki qishda anomal sovuq bo‘lsa 1 oy energo isteʼmol ko‘tarilishi mumkin” — Energetika vazirligi bo‘lim boshlig‘i

Energetika vazirligi bo‘lim boshlig‘i Orzugul Ravshanova “Yangi O‘zbekiston” nashriga bergan intervyusida energiya isteʼmoli bo‘yicha joriy etilgan 200 kilovattlik limit bo‘yicha izoh berdi. 

Orzugul Ravshanovaning aytishicha, yozda anomal issiq vaqtida yoki qishda anomal sovuq bo‘lsa 1 oy energo isteʼmol ko‘tarilishi mumkin.

Taʼkidlanishicha, 200 kilovattlik limit ishlatuvchilar aholining 60 foiziga to‘g‘ri kelgani sababli ekspertlar bilan maslahatlashilib ushbu meʼyor o‘rnatilgan.

“200 kilovattlik hajm imtiyozli, subsidiyalanadigan hajm hisoblanadi. Bu barcha uchun. Agar 200 kilovattgacha isteʼmol qiladigan bo‘lsa, 450 so‘mdan (QQS bilan) to‘lov qilish mumkin. Agar xonadonida ikkita konditsioner ishlatmoqchi bo‘lsa, fontan va basseynlardan foydalanmoqchi bo‘lishsa, marhamat, komfort uchun to‘lovni amalga oshirishsin. Faqat subsidiya evaziga bo‘lishi kerak emas”, deydi Energetika vazirligi bo‘lim boshlig‘i.

Energetika vazirligi O‘zbekistonda yaqin istiqbolda iste’molchilarga qo‘llanilayotgan oylik 200 kVt/soatgacha bo‘lgan bazaviy me’yor miqdori oshirilishiga asos mavjud emasligi haqida xabar bergan edi.