“Asr to‘yi” bo‘lishi kutilayotgan hindistonlik milliarderning sohibjamol rafiqasi — Radhika Merchant haqida nimalar ma’lum?

Radhika Merchant — farmatsevtika “qiroli” Viren Merchantning sohibjamol qizi va katta san’at ishqibozi. Tez orada u Hindistonning eng boy odamlari oilasiga kelin bo‘ladi.

Bo‘lajak qaynotasi Merchantning Anant Ambani bilan bo‘ladigan to‘yiga shunchalik ko‘p pul sarfladiki, u Osiyoning eng boy odami unvonidan mahrum bo‘lib, birinchilikni Gautam Adaniga boy berdi.

Bugun butun dunyo bu oilaning to‘y oldidan o‘tkazayotgan tantanalari va liboslarini muhokama qilmoqda, odamlar esa to‘yni intiqlik bilan kutmoqda. Kuyovning semizligi hamda “Sohibjamol va maxluq” degan haqoratli so‘zlar bilan odamlarning masxara qilishlarini qiz parvoyiga ham keltirmaydi. U Anantni qanday bo‘lsa, shundayligicha sevadi.

Radhika Merchant 1994-yil 18-dekabrda ishbilarmonlar oilasida tug‘ilgan. Uning ota-onasi milliarderlar Viren va Sheyla Merchant — dunyo miqyosida tabletka hamda kapsulalar ishlab chiqaruvchi Encore Healthcare kompaniyasining asoschilaridir. Bugungi kunda bu sog‘liqni saqlash sohasidagi butun bir ekotizim bo‘lib, u har bir kishiga to‘liq tibbiy xizmatlarni taqdim etadi.

Merchantlar oilasi hech qachon boyligi bilan maqtanmagan. Aytish joizki, 2017-yilgacha odamlar Radhikaning kimligini ham bilmas edi. U opasi Anjali bilan uchta elita maktabida o‘qigan va keyinchalik Nyu York universitetining Siyosatshunoslik va iqtisod fakultetini tamomlagan.

Uning opasi soch parvarish qilish klublari tarmog‘ining hammuassisi, shuningdek, o‘zlariga tegishli bo‘lgan oilaviy kompaniya direktori. Radhika xorijda stajirovkadan so‘ng oilaviy biznesga marketing bo‘yicha direktor sifatida qo‘shiladi. Bir nechta manbalarda Anant Ambani bilan bolaligidan tanishligi haqida ma’lumot berilgan, ammo bu haqiqat emas.

Mutaxassislarning ta’kidlashicha, Ambanilar barcha farzandlari birinchi muhabbati bilan turmush qurgan oilaning ideal qiyofasini yaratish uchun qo‘llaridan kelgancha harakat qilmoqda. Aslida, bunday nikoh faqat katta o‘g‘li Akash va Shloka Mehtaga nasib qilgan. Ambanilarning yagona qizi Isha esa sinfdoshini juda yaxshi ko‘rardi, lekin ota-onasi ularning birga bo‘lishiga ruxsat bermaydi va qiziga boshqa kuyov topishadi.

Kenja o‘g‘liga ham kelinni o‘zlari topgan — ular go‘zal Radhikani tanlashadi. Ko‘plab boy va mashhur oilalarning merosxo‘rlaridan farqli o‘laroq, u Dhirubhay Ambani xalqaro maktabida o‘qimagan va umuman yopiq turmush tarzini olib borgan.

Qiz yoshlik davrlarida ham tengdoshlari bilan yaqin bo‘lmagan, ziyofatlarga bormagan. Anant bilan ham faqat 2017-yilda ota-onasi orqali tanishgan.

Qiz 8 yil davomida bharatanatyam uslubida professional tarzda raqsga tushishni o‘rganadi va yoshligida o‘zi ham klassik raqqosa bo‘lgan bo‘lajak qaynonasi —Nita Ambanining qalbini zabt etadi. Nita bo‘lajak kelinini yaxshi ko‘radi va hozirdan Radhikani o‘zi boshqarayotgan barcha ijtimoiy loyihalarini davom ettirishga tayyorlamoqda.

Kichik o‘g‘liga Reliance Industries oilaviy kompaniyasining energiya yo‘nalishini ishonib topshirgan Mukesh Ambani uni uylantirish vaqti keldi, deb qaror qiladi. Anantning o‘zi India Today nashriga bergan intervyusida hech qachon oila qurish haqida o‘ylamaganini ochiq tan oladi.

“Bolaligimdan men hech qachon uylanmayman, deb o‘ylardim, chunki doimo hayvonlarga g‘amxo‘rlik qilishni yaxshi ko‘rganman va butun hayotimni ularga bag‘ishlashni xohlardim. Ammo Radhika bilan uchrashganimdan so‘ng, omadim borligini angladim. U orzumdagi qiz edi — go‘zal, mehribon, hayvonlarni ham yaxshi ko‘radi. Sog‘lig‘im bilan bog‘liq muammolarga duch kelganimda u doim yonimda bo‘ldi. Radhika mening kuchim va tayanchimdir”.

Do‘stlarining aytishicha, Radhikaning Anantdan oldin yigiti bo‘lgan, lekin Radhika Anantning birinchi va yagona muhabbati hisoblanadi. 2018-yilda juftlikning bir xil rangda kiyingan surati ijtimoiy tarmoqlarda tarqalib, o‘zaro munosabatlari haqidagi mish-mishlarni keltirib chiqaradi.

Biroq yoshlar yoki ularning oilalari tomonidan bu xabar tasdiqlanmaydi. Keyinchalik qiz Anantning opasi va akasining to‘ylarida, shuningdek, Ambanining barcha to‘y bazmlarida ko‘rinish beradi, ammo rasmiy tasdiq faqat 2022-yil dekabr oyida, yoshlar unashtirilganda paydo bo‘ladi.

Ular bir yarim yil oldin unashtirilgan, shunda ham bir emas, balki ikki marta. Birinchi unashtiruv 2022-yilda o‘zaro oilaviy bo‘lib o‘tgan, ikkinchisi 2023-yil yanvarida bo‘ldi. Unda Bollivud mashhurlarining yarmi qatnashgan. Bir yil o‘tgach, Ambani ikkita to‘yoldi bazmi uyushtirdi, bu bilan hammani hayratda qoldirdi.

Ambanilar oilasi mart oyida unashtiruv marosmini Jamnagarda uch kun nishonlashdi. Tadbirda butun dunyodan 1500 nafar nufuzli kishilar: biznesmenlar, sportchilar, qo‘shiqchilar va Bollivudning mashhur shaxslari ishtirok etdi.

May oyida esa 800 nafar mehmon va 600 nafar ekipaj aʼzosi to‘y oldidan ikkinchi tantana uchun hashamatli kruiz kemasida to‘planishdi. O‘rta Yer dengizi kruizi mehmonlarni Palermodan tortib Rim, Portofino va Kanngacha yetkazish uchun jo‘nadi.

To‘y iyul oyida bo‘lishi kutilmoqda va bu yilning eng hashamatli tadbiri bo‘ladi. Bu to‘y allaqachon “Asr to‘yi” deb nomlanmoqda.