Gastroenterolog Yekaterina Simbalova yozning jazirama issiq kunlarida ichimliklar tanlash bo‘yicha o‘z tavsiyalarini berib o‘tdi. Shifokor so‘zlariga ko‘ra, nafaqat oddiy ichimlik suvi, balki mineral suv chanqoqni tez qoldirish, ovqat hazm qilish tizimini yaxshilash uchun ajoyib tanlovdir.
Mineral suv terlash tufayli tanadan chiqib ketgan elektrolitlar darajasini tezroq tiklaydi, shuning uchun issiq havoda oddiy suvdan ko‘ra mineral suv ichish foydaliroqdir.
Shuningdek, chanqoqni uzoq muddatga qondiradigan ichimliklar sirasiga shakarsiz, uy sharoitida tayyorlangan mevali kompot va morslar kiradi.
Mutaxassisning fikriga ko‘ra, kvas ham juda yaxshi tanlov, chunki u ovqat hazm qilishni yaxshilaydi va ichaklar mikroflorasiga ijobiy ta’sir ko‘rsatadi. Uy sharoitida tayyorlanadigan ushbu ichimliklar do‘konlardagidan farqli o‘laroq, konservant, qo‘shimcha va bo‘yoqlardan xoli. Shuning uchun ular sog‘liqqa e’tibor qaratadigan odamlar uchun doimo salqinlatuvchi variant bo‘lib qoladi.
“Kvas tarkibida B, C va E vitaminlari mavjud”, deya qo‘shimcha qildi shifokor.
“Bundan tashqari, yoz faslida ayron yoki kefir kabi sut mahsulotlarini kundalik taomnoma ro‘yxatiga kiritish mumkin. Ular tarkibidagi sut kislotasi chanqoqni yaxshi qondiradi, oson hazm bo‘ladi va ular tarkibidagi foydali vitaminlar tanada yaxshi so‘riladi. Kefir va ayron ovqat hazm qilish tizimini rag‘batlantiradi va ichak mikroflorasini yaxshilaydi”, deydi gastroenterolog.
Izoh (0)