O‘zbekiston va Islom taraqqiyot banki (ITB) o‘rtasida hamkorlik aloqalari yanada jadallashtiriladi. Bu haqda “Dunyo” axborot agentligi xabar berdi.
Ma’lum qilinishicha, O‘zbekiston elchisi Nodirjon Turgunov ushbu bank Loyihalashtirish masalalari departamenti bosh direktori Anas Aysam bilan uchrashuv o‘tkazdi. Unda O‘zbekiston va ITB o‘rtasida hamkorlik aloqalarini yanada jadallashtirish, O‘zbekistonda ishlab chiqilayotgan yirik loyihalarni imtiyozli moliyalashtirish, xotin-qizlar va yoshlarni qo‘llab quvvatlash hamda texnik-gumanitar yordamlarni jalb qilish masalalari muhokama qilindi.
Tomonlar transport, logistika, taʼlim, qishloq xo‘jaligi, suv, atrof-muhit, chorvachilik, obod qishloq va boshqa yo‘nalishlardagi loyihalarni moliyalashtirish imkoniyatlari bo‘yicha fikr almashdi.
O‘zbekistonda xotin-qizlar va yoshlarni qo‘llab-quvvatlashga qaratilgan muhim dasturlar eʼtirof etildi va ularda ITB ishtirokini kengaytirish imkoniyatlari ko‘rib chiqildi.
Bundan tashqari mazkur bank tomonida amalga oshirilayotgan loyilar ijrosini doimiy tarzda monitoring qilib borish va kelgusi qo‘shma loyihalarni muhokama qilish uchun ITB vakillarining O‘zbekistonga amaliy safarini tashkil etish to‘g‘risida kelishib olindi.
2023-yilning aprelida Toshkent xalqaro investitsiya forumi doirasida tashrif buyurgan Islom taraqqiyot banki prezidenti Muhammad bin Sulaymon Shavkat Mirziyoyev qabulida bo‘lgandi. O‘zbekiston prezidenti ITB bilan yangi sheriklik dasturini birgalikda amalga oshirish muhimligini qayd etib, yangi o‘rta muddatli sheriklik dasturi doirasida bank guruhi bilan hamkorlikni yanada kengaytirish masalalarini muhokama qilgandi.
Izoh (0)