Uzbekistan Airports Toshkent aeroporti uchib ketish zali yonida sodir bo‘lgan yong‘in yuzasidan ma’lumot berdi.
Qayd etilishicha, bugun, 6-iyul kuni soat 11:20 da Toshkent xalqaro aeroporti vokzal oldi maydonida yangi “Terminal” kafesida yong‘in kelib chiqqan.
Voqea joyiga zudlik bilan aeroport va shahar o‘t o‘chirish bo‘limlari yetib kelgan. Yong‘in soat 11:47 da o‘chirilgan. Yong‘in natijasida 5 kvadrat metr maydonga zarar yetkazilgan. Jabrlanganlar yo‘q. Dastlabki ma’lumotlarga ko‘ra, hodisaga oshxonadagi kichik yong‘in sabab bo‘lgan.
“Toshkent xalqaro aeroporti normal rejimda ishlamoqda”, deyiladi xabarda.
Avvalroq Surxondaryoda beshta savdo do‘konida yong‘in sodir bo‘lgani, Toshkentdagi avtoservisda 3 ta avtomobil yonib ketgani, “Kosmonavtlar” metro bekati yaqinida yerosti kabeli yongani to‘g‘risida xabar berilgandi. Kuni kecha esa Toshkentdagi “Chorsu” bozorida yong‘in chiqqan edi. Shahar va tuman hokimliklari vakillari yong‘indan zarar ko‘rgan tadbirkorlar bilan uchrashgan.
Izoh (0)