Film va seriallar suratga olinganidan keyin tomoshabinlar orasida mashhur bo‘lib ketgan uylar (foto)

Biz sevib tomosha qiladigan filmlardagi bosh qahramonlar yashaydigan uylar dekoratsiya emas, balki haqiqiy xonadonlardir. Ularning aksariyati hozirda diqqatga sazovor joy yoki muzeyga aylantirilgan va butun dunyodan ko‘plab sayyohlar tashrif buyuradigan sevimli maskan hisoblanadi. Ayrimlari esa ijaraga beriladi va ularda yashash uchun sezilarli darajada yuqori narx belgilanadi.  

Noyaning uyi, “Xotira kundaligi”

Gollivudning eng qayg‘uli melodramalaridan biri bo‘lgan “Xotira kundaligi” asari suratga olingan uy AQSHning Janubiy Karolina shtatidagi Vadmalo orolida joylashgan.

Bugungi kunda uy muzey sifatida tashrif buyuruvchilar uchun ochiq. Uning qiymati taxminan 1,3 million dollarni tashkil etadi.

Makkallisterlar uyi, “Uyda yolg‘iz”

Kevin (Makoley Kalkin)ni ko‘cha o‘g‘rilaridan mohirlik bilan himoya qilgan Makkalisterlar uyi Chikagoda joylashgan bo‘lib, 1920-yillarda qurilgan. 400 kvadrat metrlik bino diqqatga sazovor joylardan biri hisoblanadi.

Hozirda mazkur uyda xonadonni bir yarim million dollarga xarid qilgan oila istiqomat qiladi. Kevinning uyi Illinoys shtatidagi eng ko‘p tashrif buyuriladigan sayyohlik joylaridan biri hisoblanadi.

Bellaning uyi, “Sumerki”

Vampirlar haqidagi filmda Bella Svon (Kristen Styuart) otasi bilan birga yashagan kichkina uy AQSHning Oregon shtatidagi Sent Helens shahrida joylashgan.

U 1930-yillarda qurilgan. Uyda beshta yotoqxona, oshxona va kaminli mehmonxona mavjud.

Dursley uyi, “Garri Potter” franshizasi

Ushbu franshiza ixlosmandlari Garrining birinchi yashagan uyi manzilini yoddan biladi: Surrey, Little Whinging, 4 Privet Drive. Aslida uy Berkshirda, Angliyaning janubi-sharqida joylashgan.

Uy juda oddiy va kamtarona qurilgan: xonadonda uchta yotoqxona, mehmonxona, oshxona va bitta hammom mavjud. Uyning asl egalari bir kun kelib butun dunyodan kelgan sayyohlar ushbu uyni ko‘rishni istashini xayoliga ham keltirmagan. 2010-yilda uyning yangi egalari uni 660 ming dollarga sotib oldi va ta’mirladi. Ammo Garri yashagan zinapoya ostidagi kichik xona o‘zgarishsiz qoldirildi.

Opa-singil Hollivellar uyi, “Sehrlanganlar”

Sehrgar opa-singillar yashagan “Sehrlanganlar” teleserialidagi to‘q qizil rangli muhtasham saroy Los-Anjelesda joylashgan. Uy 1887-yilda qurilgan. Serialni suratga olish uchun uyning faqat fasad qismi ishlatilgan. Serialdagi xonalarning bari maxsus pavilyonda suratga olingan.

Jey Getsbi qasri, “Buyuk Getsbi”

Jey Getsbi (Leonardo Di Kaprio) ning hashamatli saroyi pavilyon emas, balki haqiqiy binodir: filmni suratga olish uchun dekoratsiyalar va maxsus effekt rassomlari Sidneydagi Avliyo Patrik binosiga turli o‘zgartirishlar kiritdi. Uyga bir nechta minoralar qo‘shildi, butun fasadga bezak berildi, hovli esa favvora bilan jihozlandi.

Getsbi koshonasining ichki qismini tubdan o‘zgartirishga roppa-rosa ikki hafta vaqt ketdi.

Fil Kollinzning uyi, “Sug‘ur kuni”

Fil Kollinz (Bill Myurrey) har kuni ertalab uyg‘onganda bir xil kun qayta-qayta boshlanadigan uy AQSHning Illinoys shtatidagi Vudstok shahrida joylashgan. Bugungi kunda uy ijaraga beriladigan kichik mehmonxonadir.

Xonadon 1895-yilda qurilgan bo‘lsa ham, uning asl ko‘rinishi hamon saqlanib qolgan.