O‘zbekiston investitsiyalar, sanoat va savdo vaziri Laziz Qudratov va Yaponiya elchisi Xatori Takashi beg‘araz yordam doirasida amalga oshirilayotgan 3 milliard iyenalik (6,3 million dollar) “Iqtisodiy va ijtimoiy rivojlanish dasturi” bo‘yicha almashinuv notalarini imzoladi. Bu haqda vazirlik matbuot xizmati xabar berdi.
Hujjatlarga asosan O‘zbekistonga kompyuter tomografiyasi skanerlari va rentgen apparatlari bilan jihozlangan qo‘shimcha 4 ta tibbiy mobil konteyner yetkaziladi. Bu bilan respublika bo‘ylab samarali tibbiy yordam ko‘rsatish imkoniyatlari yanada yaxshilanadi.
Tomonlar hamkorlikni rivojlantirish, jumladan, O‘zbekistonda yuqori sifatli tibbiy xizmatlardan foydalanish imkoniyatlarini yanada kengaytirishga sodiqliklarini bildirdilar, — deyiladi xabarda.
Kompyuter tomografiyasi skanerlari qator kasalliklarni aniqlashda juda muhim hisoblanadi. Mobil tibbiy konteyner har qanday joyda, shu jumladan, favqulodda vaziyatlarda ham xizmat ko‘rsatishi mumkin.
Avvalroq Yaponiya Xitoy, Hindiston, BAA va O‘zbekiston kompaniyalariga Rossiyaga qarshi sanksiyalarni chetlab o‘tgani uchun sanksiyalar joriy qilishi to‘g‘risida xabar berilgandi. Shuningdek, Yaponiya kompaniyalari O‘zbekistonda tabiiy ofatlarning oldini olish mahsulotlarini ishlab chiqarishi mumkinligi aytilgan edi.
Izoh (0)