Toshkent shahar sudining Jinoyat ishlari bo‘yicha apellyatsiya instansiyasi JIB Toshkent shahar sudi Jinoyat ishlari bo‘yicha sudlov hay’atining 2024-yil 26-fevraldagi hukmini o‘zgarishsiz qoldirdi. 7 nafar sudlanuvchi tomonidan kiritilgan apellatsiya shikoyati qanoatlantirmasdan qoldirildi. Bu haqda sudda qatnashgan “Daryo” jurnalisti xabar berdi.
Sardor Kariyevning onasi Munira Kariyeva tomonidan sudning depozit hisob raqamiga to‘langan 2,5 milliard so‘m mablag‘ jabrlanuvchilarning qonuniy vakillariga teng miqdorda taqsimlanishi belgilandi.
Eslatib o‘tamiz, apellyatsiya shikoyati sudga 20 yil muddatga ozodlikdan mahrum qilingan S.R.P., 18 yil muddatga ozodlikdan mahrum qilingan Sardor Kariyev va uning har biri 16 yil muddatga qamalgan o‘rinbosarlari — A.Azimov va N.Musayev, 16,6 yilga ozodlikdan mahrum etilgan Sh.Shodmanov hamda 2 yil muddatga ozodligi cheklangan Sh.Abdug‘aniyev va I.Mirzayoqubov tomonidan kiritilgandi.
Shuningdek, “Dok-1 Maks” ishini ko‘rib chiqqan sudlov hayʼati siropdan zaharlanib vafot etgan 68 nafar bolaning qonuniy vakillariga 6 nafar sudlanuvchi hisobidan solidar tartibda 1 milliard so‘mdan tovon puli undirilishini belgilagandi. Og‘ir tan jarohati olib nogiron bo‘lib qolgan 16 nafar va yengil tan jarohati olgan jabrlanuvchilarning qonuniy vakillariga esa 500 million va 200 million so‘m miqdorida tovon puli undiriladigan bo‘lgandi.
Izoh (0)