Airbnb nomli butun dunyo bo‘ylab uy-joylarning ijarasi haqidagi ma’lumotlar joylashgan platformada “Boshqotirma” multfilmidan ilhomlanib qurilgan uy ijaraga berildi.
U AQSHning Los Anjeles shahrida joylashgan. Uyga talab shunchalik kattaki, hozircha u yerda turar joyni bron qilishning imkoni yo‘q: saytda yaqin bir necha oyga bo‘sh joy yo‘qligi aytilgan.
Uyga kiraverishda avval “Quvonch” xonasi (Raylining boshida yashaydigan ko‘plab his-tuyg‘ulardan biri) sizni kutib oladi.
Mazkur uyda Rayli uchun bosh ofis ham mavjud bo‘lib, u yerdan “bosh qahramon hissiyotlarini boshqarish” mumkin bo‘ladi.
“Boshqotirma” multfilmi uslubidagi uy 24 kun ichida qurib bitkazilgan. Uning ikkita yotoqxonasi bor: biri sariq (bu Quvonch xonasi), ikkinchisi esa yangi qahramon — Xavotirning binafsha va olov rangdagi xonasidir. E’londa aytilishicha, agar siz Quvonchning yotoqxonasida bir kecha vaqtingizni o‘tkazsangiz, barcha tashvishlaringizdan xalos bo‘lishingiz mumkin.
Shuningdek, uyda ikkita hammom va boshqaruv markazi uslubida yaratilgan mehmonxona ham mavjud bo‘lib, uning atrofida Raylining eng yorqin xotiralarini ifodalovchi porlab turuvchi chiroqli sharlar o‘rnatilgan. Airbnb saytida aytilishicha, mehmonlar mazkur uyda o‘z xotiralaridan iborat shar yaratib, uni o‘zlari bilan birga olib ketishlari mumkin.
Ushbu uyda Raylining boshqa hissiyotlari uchun mo‘ljallangan xonalar ham bor. Masalan, Qayg‘u uslubidagi xonaning shiftida bulut ko‘rinishidagi lampalar osilgan va ularning usti ko‘z yoshlari ko‘rinishida ko‘k rangli dekor bilan bezatilgan.
Airbnb platformasida turli filmlar syujetidan ilhomlanib qurilgan uylar haqida e’lonlar tez-tez uchrab turadi. Nyu Meksiko shtatida joylashgan “Yuqoriga” multfilmidagi barcha elementlar mavjud uchar uy shular jumlasidandir.
Pixar va Disney’ning “Boshqotirma-2” animatsion filmining birinchi qismi 2015-yilda namoyish etilgan, unda Rayli ismli qizaloqning miyasida yashaydigan beshta hissiyot: Quvonch, Qayg‘u, Qo‘rquv, G‘azab va Xavotir haqida hikoya qilinadi. Rayli asta-sekin ulg‘ayib boradi, bu uning his-tuyg‘ularini xotirasida saqlab qolishga va halokatli o‘zgarishlarning oldini olishga yordam beradi.
Izoh (0)