Toshkentda 182 ta jarimani to‘lamagan haydovchining mashinasi xatlandi

Toshkent shahar Olmazor tumanida 182 ta jarimani to‘lamagan haydovchining mashinasi xatlandi. Bu haqda MIB axborot xizmati “Daryo”ga xabar berdi. 

Unga ko‘ra, Majburiy ijro byurosining Olmazor tuman bo‘limi ish yurituviga Toshkent shahar IIBB YXXB ning qarorlariga asosan, qarzdor F.M.dan 2021-yildan 2024-yilga qadar jami 182 ta 59 370 000 so‘m miqdoridagi ijro hujjati bo‘lim ish yurituviga kelib tushgan. 3 yil davomida yo‘l harakati qoidalarini buzib harakatlangan haydovchining ma’muriy jarimalari 182 ta yetib, salkam 60 million so‘m qarzdorlik aniqlangan.

Bo‘lim davlat ijrochisi tomonidan majburiy ijro harakatlariga kirishilib, qarzdorga tegishli bo‘lgan avtotransport vositasiga qidiruv e’lon qilingan. Harakatlar davomida unga tegishli bo‘lgan Cobalt topilib, davlat ijrochisi tomonidan xatlangan.   

Hozirda avtotransport vositasini auksion savdolariga chiqarish choralari ko‘rilmoqda. Onlayn savdolardan tushgan pul mablag‘lari qarzdorlikni qoplash uchun davlat foydasiga yo‘naltiriladi.