Ukraina prezidenti Vladimir Zelenskiy mamlakat birlashgan qurolli kuchlari qo‘mondonini lavozimidan oldi. Bu haqda RFE/RLʼS manbasi prezident idorasi tarqatgan xabarga asoslanib, maʼlumot berdi.
Zelenskiy Ukraina birlashgan kuchlari qo‘mondoni Yuriy Sodol o‘rniga brigada generali Andrey Xnatov tayinlanishini eʼlon qilgan. 24-iyun kuni eʼlon qilingan murojaatda Kiyev hukumati rahbari qo‘mondonning vazifasidan olinishi sabablarini tushuntirmagan.
Manbada aytilishicha, oldinroq Ukraina deputati Maryana Bezuxla Sodolning Odessadagi chiqishlar va qarorlarini tanqid ostiga olgan. Bundan tashqari, Milliy gvardiyaning “Azov” brigadasi shtab boshlig‘i Bogdan Krotevich davlat tergov byurosiga Sodolni tergov qilish talabi bilan ariza topshirgan.
Ukrainaning bir qator rasmiylari qo‘mondon Yuriy Sodolni jiddiy harbiy muvaffaqiyatsizliklar va shaxsiy tarkibda katta talafotlarga ro‘baro qilishda ayblagan. “Azov” brigadasi shtab boshlig‘i Bogdan Krotevich generalni hattoki “har qanday rus generaliga solishtirganda ko‘proq ukrainalik askarlarni o‘ldirganlikda” ayblagan.
Harbiylarning bir guruhi yangi qo‘mondon Andrey Xnatovning vazifaga tayinlanishini ijobiy qabul qilgan. Uning harbiy rahbariyatga kelishi frontga xushxabarlar keltirishiga ishonilgan.
“Xnatov juda yaxshi ofitser bo‘lgan. Umid qilamanki, uning kelishi ortidan frontdagi yangiliklar ijobiy tus oladi”, — degan Bogdan Krotevich.
Bo‘shatilgan general Yuriy Sodol o‘tgan yilning fevralida sobiq qo‘mondon Valeriy Zalujniy va Zelenskiy o‘rtasida munosabatlar yomonlashuvi ortidan tayinlangan edi. Uning boshqaruvi paytida mamlakat sharqiy mudofaa chizig‘i bo‘ylab katta hududlarni Rossiyaga boy bergan.
Sodol Ukrainaning sharqiy va janubiy quruqlikdagi kuchlarini boshqargan. So‘nggi oylarda kuchayib borayotgan Rossiya hujumi bilan to‘qnashgan.
Kiyevdagi bir guruh deputatlar Yuriy Sodolni muvaffaqiyatsizliklarda ayblashga qarshi chiqqan. Ukraina sharqda ustunlikni yo‘qotishi qo‘mondonning faoliyatiga emas, balki G‘arb yordami kechikishi va Rossiyada harbiy ishlab chiqarishning ko‘payishiga bog‘liq ekani aytilgan.
Izoh (0)