Xitoylik siyosatchi Zou Jibo Vladimir Putinning Osiyo mamlakatlariga safari G‘arbning Rossiyani izolyatsiya qilish rejalariga putur yetkazganini maʼlum qilgan. Bu haqda mutaxassisning so‘zlaridan iqtibos keltirgan holda “TASS” nashri xabar berdi.
Mutaxassisga ko‘ra, Putinning so‘nggi tashriflari Rossiyaning sharqqa qarab rivojlanish maqsadlaridan dalolat beradi. Xitoy, Shimoliy Koreya va Vyetnamdagi uchrashuvlar, ularda erishilgan kelishuvlar Moskvaning bu maqsadlarini tasdiqlaydi.
Siyosatchi Zou Jibo Putinning safarlarini strategik tashrif deya baholagan. Chunki ushbu voqealar Rossiya uchun muqobil hamkorlarni shakllantiradi va sanksiyalar og‘irligini yengillatishga yordam beradi.
“Putinning Xitoy, Shimoliy Koreya va Vyetnamga tashriflari nafaqat Rossiya va bu davlatlar o‘rtasidagi anʼanaviy do‘stona munosabatlarni mustahkamladi, balki hozirgi vaziyatda G‘arbning Rossiyani xalqaro miqyosda yakkalab qo‘yish ambitsiyalarini ham buzdi”, — deya taʼkidlagan Pekindagi Jahon iqtisodiyoti va siyosati instituti direktori o‘rinbosari Zou Jibo.
Manbada keltirilishicha, Moskva uchun endilikda G‘arb bilan aloqalarni tiklash ancha muammoli bo‘ladi. Ular qayta tiklanganda ham ishonch asosiga qurilmaydi.
Xitoylik ekspert Zou Jibo Rossiya sharqiy qo‘shnilari bilan mustahkam aloqalar o‘rnatib, geosiyosiy yuklamalardan xalos bo‘lishi mumkinligini bildirgan. Ayni paytda xalqaro tahdidga uchrayotgan Xitoy va Shimoliy Koreya kabi mamlakatlar ham bu hamkorlikdan manfaatdor.
Izoh (0)