O‘zbekistonda asosiy oziq-ovqat mahsulotlari uchun kreditlarni qaytarish muddati bir yilga uzaytirildi

O‘zbekistonda asosiy oziq-ovqat mahsulotlari uchun kreditlarni qaytarish muddati 2025-yil 1-iyulga qadar uzaytirildi.

Bu haqda “Ichki iste’mol bozorini asosiy turdagi oziq-ovqat mahsulotlari bilan ta’minlash bo‘yicha qo‘shimcha chora-tadbirlar to‘g‘risida”gi hukumat qarorida belgilandi.

Vazirlar Mahkamasining 2021-yil 7-oktyabrdagi qaroriga muvofiq oziq-ovqat mahsulotlarini import qilishda tadbirkorlik subyektlarini aylanma mablag‘lar bilan ta’minlash maqsadida Tiklanish va taraqqiyot jamg‘armasi 32,8 million dollar ekvivalentida milliy valyutada hamda Iqtisodiyot va moliya vazirligi 200 milliard so‘m miqdordagi mablag‘larni foizsiz depozitga joylashtirishi uchun ajratdi. Ushbu mablag‘lar tijorat banklariga ularning so‘rovlariga asosan 2024-yil 1-iyulga qadar qaytarilishi kerak edi.

Hujjat bilan Vazirlar Mahkamasining ushbu qaroriga o‘zgartirish kiritilmoqda, unga asosan qaytarish muddati 2025-yil 1-iyulga qadar uzaytirildi. Ushbu qaror Respublikada aholini ijtimoiy muhim turdagi oziq-ovqat mahsulotlari bilan barqaror narxlarda uzluksiz va kafolatli ta’minlash maqsadida qabul qilindi.

Belgilanishicha, Tiklanish va taraqqiyot jamg‘armasi hamda Iqtisodiyot va moliya vazirligining foizsiz depozitlari hisobidan kreditlar tijorat banklari tomonidan tadbirkorlik subyektlariga likvidli garov ta’minoti asosida o‘simlik yog‘i, kartoshka, guruch, shakar xomashyosi, go‘sht (mol, qo‘y, parranda go‘shti), muzlatilgan baliq importi uchun yillik 4 foiz stavkada ajratiladi.