Janubiy Koreyada zavoddagi yong‘in sabab halok bo‘lganlar orasida o‘zbekistonliklar aniqlanmadi

Janubiy Koreyada litiy batareyalari ishlab chiqaradigan zavodda yong‘in chiqishi oqibatida 20 ga yaqin ishchi halok bo‘lgani haqida xabar berilgandi. 

Tashqi mehnat migratsiyasi axborot xizmatining xabar berishicha, yong‘in oqibatida kamida 22 kishi halok bo‘lgan va ularning 20 nafari chet davlatlar fuqarolari hisoblanadi. Hodisa Seul janubidagi Xvason shahrida yuz bergan. Litiy batareyalari ishlab chiqaruvchi zavodning asosiy ishlab chiqarish binosida nomaʼlum sababga ko‘ra alanga yuzaga kelgan.

Zavod hududida kichik portlashlar davom etayotgani xabar qilingan. Faol yonish natijasida yaqin atrofdagi turar joy binolariga uchqunlar kelib tushayotgani aytilgan.

Yong‘in nomaʼlum sabablarga ko‘ra umumiy maydoni qariyb 2300 kvadrat metr bo‘lgan uch qavatli, temir-beton konstruksiyali binoda sodir bo‘lgan. O‘t o‘chiruvchilar yong‘inni to‘liq o‘chirishda qiyinchiliklarga duch kelishgan, chunki litiy batareyalarini odatiy vositalar bilan o‘chirish qiyin.

Ushbu yong‘in oqibatida jabrlangan yoki halok bo‘lganlar orasida hozirgi vaqtga qadar O‘zbekiston fuqarolari aniqlanmadi.