Hozirgi zamonda ortiqcha vaznni yo‘qotishning juda ko‘plab usullari mavjud. Agar ozishni istasangiz va ishni nimadan va qanday boshlashni bilmayotgan bo‘lsangiz, unda quyidagi samarali va xavfsiz tavsiyalarga amal qiling.
Choy, sharbat va qahvani shakar qo‘shmay iching
Ha, gazli ichimliklarni har kuni iste’mol qilishga o‘rganib qolgan va shakarsiz hayotini tasavvur qila olmaydigan shaxslar uchun bu ish mushkul bo‘ladi. Lekin shakarsiz choy va qahvada kaloriya juda kam bo‘ladi, demak, mushaklar atrofida hech qanday ortiqcha yog‘ to‘planmaydi.
Tongda osh qoringa ichilgan iliq suv metabolizmni ishga tushiradi va yaxshilangan moddalar almashinuvi jarayoni tezroq ortiqcha kilogrammdan halos bo‘lishiga yordam beradi. Kuniga 2-3 litr suv ichish kerakligi haqidagi tavsiyaning esa ilmiy asosi yo‘q. Kunlik ehtiyojga qarab suv ichaverasiz.
Mahsulotlarga qo‘shiladigan shakardan yiroq bo‘ling
Shakar biz kutmagan mahsulotlar ichida ham serob. Masalan, mevali yogurt, tvorog, ketchup va boshqa souslarni tanlashda ularning tarkibi bilan tanishing.
Sabzavot va mevalarni ko‘proq iste’mol qiling
Vazn tashlash masalasiga oqilona yondashing: o‘zingizni sinalmagan va tez natija ko‘rsatishga va’da beradigan, sog‘liq uchun xavfli parhezlar bilan qiynamang. Asosiysi — to‘g‘ri ovqatlanish qoidalariga amal qilish. Ko‘nglingiz shirin narsa tusasa, shokolad va murabbo o‘rniga biror meva bilan tamaddi qiling.
Nonushtadan voz kechmang, kechki ovqatni esa o‘tkazib yuborish mumkin
Tongni bir stakan iliq suv bilan boshlash albatta foydali, ammo oradan 40 daqiqa yoki 1 soat o‘tgach, to‘liq nonushta qilish kerak. Pishloq va tuxumdan tayyorlangan sendvichdan olingan kaloriyalar tezda energiyaga aylanadi, lekin kotlet yoki shokoladli tort juda uzoq vaqt organizmda qayta ishlanadi.
Ovqatlanish vaqtida smartfondan foydalanmang
Tushlik paytida parallel ravishda telefonda xabarlar o‘qisangiz yoki televizor ko‘rsangiz, qachon to‘yinish hissi paydo bo‘lganini sezmay qolasiz va buning natijasida o‘zingiz bilmagan holda ko‘proq taom yeb qo‘yasiz.
Tushlik va kechki ovqat orasidagi gazaklar miqdoriga e’tibor bering
Tushlik va kechki ovqat orasida biror pechenye, kolbasa mahsulotini yeb, kechki taomdan so‘ng sevimli muzqaymoq bilan kunni yakunlasak, qo‘shimcha kaloriyalar ko‘payib ketishi shubhasiz. Ba’zi shaxslar uchun doimiy biror narsa yeb yurish odat tusiga kirib qoladi, qolganlar esa kun davomida ko‘p ishlagani tufayli energiya yetishmasligidan tamaddi qilib oladi. Agar sizda birinchi holat kuzatilsa, bunday odatga barham berish lozim.
Badantarbiya bilan shug‘ullaning
Yoga, velosipedda yurish, suzish, ochiq havoda yugurish yoki 8-10 ming qadamni piyoda bosib o‘tish — o‘zingizga mos va qulay bo‘lgan o‘rtacha qiyinlikdagi jismoniy faoliyatni tanlang. Mashqlar yanada qiziqarli bo‘lishi uchun do‘stlaringizni chaqiring, pozitiv fikrlang. Sportdan keyini yoqimli og‘riq va charchoq tanangiz yanada kuchli bo‘layotganini anglatadi, har 10 ming qadam yurish siz orzu qilgan vazn ko‘rsatkichiga yaqinlashtiradi.
Har kuni taroziga chiqmang
Doimiy vaznni tekshirib borish insonda motivatsiyani so‘ndirishi, xafsalani pir qilishi mumkin. Bir kunda natijaga erishish esa amrimahol. Shu tufayli vaznni bir haftada bir marta o‘lchash asab tolalaringizni qutqaradi. Agar siz har 7-10 kunda bir marta vaznni tekshirsangiz, haqiqiy dinamika va natijani ko‘rasiz.
Ruhiy holatingizga e’tiborli bo‘ling
Doimiy og‘ir ovqatlar va shirinliklar iste’mol qilib yurgan insonlar uchun birdaniga sog‘lom ovqatlanish tartibiga o‘tish murakkab vazifadir. Shu sababli stressga tushmaslik uchun bu ishni asta-sekinlik va bosqichma-bosqich amalga oshirish mumkin. Stress — vazn yo‘qotish jarayonining ashaddiy dushmanlaridan biri bo‘lib, tushkunlik va asabiylik hatto eng samarali parhez natijasini nolga teng qilishi mumkin. Shuning uchun ruhiy salomatligingizni kuzatib borish va zarur holatlarda mutaxassis yordamiga murojaat qilish muhimdir.
Kun tartibiga amal qiling
To‘g‘ri kundalik tartib deganda har kuni takrorlanadigan va asosiy harakatlarni bajarish uchun vaqtni to‘g‘ri rejalashtirishni anglatadi. Bularga ish, ovqatlanish, tungi uyqu, shu jumladan uyda va sport zalida faol mashg‘ulotlar kiradi. Agar siz kun tartibingizni biroz yaxshilasangiz, tetik holda uyg‘ona boshlaysiz va tanangiz metabolizmga ta’sir qiluvchi kortizol va leptin kabi stress gormonlarini kamroq ishlab chiqaradi. Kundalik rejimga rioya qilishga harakat qiling, ertalab soat 10.00 dan kechiktirmasdan nonushta qiling, tushlik va kechki ovqatni ham kechiktirmang. So‘nggi tamaddi uxlashdan 4 soat avval bo‘lishi lozim. Ertalab ishtaha bilan nonushta qilish uchun ozgina ochlik hissi bilan yotish yaxshiroqdir. Ideal holda, uyqu 7-8 soat bo‘lishi kerak.
Izoh (0)