Samarqandda 34 marta yo‘l qoidasini buzib, jarimasini to‘lamagan fuqaroning Nexia-3 avtomashinasi Toshkentda ushlanganda uning 118 million so‘mlik kredit qarzi borligi ham aniqlandi.
MIB axborot xizmati “Daryo”ga xabar berishicha, byuroning Samarqand viloyati boshqarmasi va ichki ishlar organlari yo‘l harakati xavfsizligi xodimlari hamkorligida yo‘l harakati qoidalarini buzgani uchun qo‘llanilgan ma’muriy jarimalarni undirish yuzasidan reyd tadbirlari o‘tkazilmoqda. Qarzdorlik o‘z vaqtida bartaraf etilmasa, avtotransport vositasiga nisbatan qidiruv e’lon qilinib, qarzdorning boshqa daromadlari aniqlanadi va undirishga yo‘naltiriladi.
Ayni paytda majburiy ijro byurosi organlari ish yurituvidagi ijro hujjatlariga ko‘ra, 34 marta yo‘l harakati qoidasini buzgan Kattaqo‘rg‘on tumanida yashovchi fuqaro K.M.ning Nexia-3 avtotransport vositasi Toshkent shahridan topilib, vaqtinchalik saqlash uchun jarima maydonchasiga joylashtirilish vaqtida uning yana 118 million 140 ming so‘mlik kredit qarzi va 4 million 823 ming so‘mlik davlat boji ham aniqlangan.
Hozirda qarzdorliklar to‘liq bartaraf etmasa, transport vositasi tegishli tartibda auksion savdolarida sotilib, tushgan mablag‘lar qarzdorlikka yo‘naltiriladi.
Izoh (0)