“Nogironlarning panduslar orqali binolarga kirishida katta muammolar bor, maxsus liftlarni gapirmasa ham bo‘ladi” — senator

Bugun, 21-iyun kuni Senatning ellik uchinchi yalpi majlisida “Nogironligi bo‘lgan shaxslarning huquqlari to‘g‘risida”gi O‘zbekiston Respublikasi qonuniga qo‘shimcha va o‘zgartirishlar kiritish haqida”gi qonunini ko‘rib chiqildi.

Qonun ijtimoiy infratuzilma obyektlarini nogironligi bo‘lgan shaxslarning ularga moneliksiz kirishi uchun moslashtirish asoslarini belgilovchi normalar bilan to‘ldirilmoqda.

Ijtimoiy tuzilma obyektlarini moslashtirish masalasi eng avvalo binolarga kirib chiqadigan panduslar va yuqori qavatlarga ko‘tariladigan liftlar bilan ham bog‘liq. Mana shu joyda bizda juda katta kamchiliklar bor.

Eng avvalo, ijtimoiy obyektlarga kirib-chiqishdagi panduslarning qiyaligi 50 gradusdan balandlari ham bor. Bunday holatda nogironligi bor shaxslar aravachada chiqolmaydi. Hatto aravachani yetaklovchi kishi ham oyog‘i toyib, qiylanadi. Maxsus liftlar haqida gapirmasa ham bo‘ladi.

Qonun qabul qilinganidan keyin joylardagi mas’ul idoralar barcha ijtimoiy tuzilma obyektlarini xatlovdan o‘tkazishi kerak, — dedi senator Abdurahim Erkayev.

Senat raisi Tanzila Norboyeva yuqorida aytilgan fikrlarga qo‘shilib, bunday shaxslar to‘siqsiz harakatlanishlari uchun hali zarur shart-sharoitlarni yaratish borasida juda ko‘p vazifalar turganini alohida ta’kidlab o‘tdi.

Ushbu qonun bilan nogironligi bo‘lgan shaxslarning:

• odil sudlovdan foydalanish,
• saylash va saylanish,
• referendumda ishtirok etish,
• ta’lim olishga bo‘lgan huquqlarini ta’minlash kabi o‘zgartirishlar kiritilmoqda.

Muhokama yakunida qonun senatorlar tomonidan ma’qullandi.