O‘zbekistonning eng yirik uyali aloqa operatori “Ucell” Orol dengizi sohilidagi “Aral Plaza” sayyohlik dam olish maskanida yangi tayanch stansiyalarini ishga tushirdi. Kompaniya mamlakatning sayyohlik markazlarida sifatli aloqa xizmatlarini ko‘rsatish va taqdim etish maydonlarini qamrab olish va kengaytirish ishlarini doimiy ravishda davom ettirmoqda.
Orol dengizi sohilida o‘rnatilgan tayanch stansiya ovozli aloqa va yuqori tezlikdagi internetni o‘z ichiga olgan barcha mobil aloqa xizmatlarini taqdim etadi. Signal dengiz qirg‘og‘iga yetib borishi uchun oraliq stansiyalar zanjiri qurilgan, ulardan biri eng yaqin aholi punktidan 27 kilometr uzoqlikda joylashgan.
Maxsus iqlim sharoiti va harorat o‘zgarishini hisobga olgan holda, balandligi 70, 36 va 30 metr bo‘lgan antenna-mast inshootlari o‘rnatilgan bo‘lib, ularda issiq va sovuqqa chidamli uskunalar o‘rnatilgan.
Ustyurt platosidagi energiya infratuzilmasi mavjud bo‘lmagan uzoq joylarda tayanch stansiyalarning uzluksiz ishlashini taʼminlash uchun generatorlar va quyosh elektr stansiyalari kabi zamonaviy muqobil energiya manbalaridan foydalaniladi. Elektr taʼminoti tizimlarida termostabil xonalarda zamonaviy, tez zaryadlanuvchi batareyalardan foydalanilgan.
Ucell-Nukus Mintaqaviy bo‘limi direktori Bayram Jumagulov:
“Biz ushbu mintaqaning og‘ir iqlim sharoitini hisobga olgan holda “Aral Plaza” sayyohlik dam olish maskanida mustahkam aloqa qamrovini taʼminlashga harakat qildik.
Bu yerda, ko‘rib turganingizdek, hatto betonlash ishlarini ham olib borish ham qiyinchilik tug‘diradi: shuning uchun tayyor konstruksiyalarni olib keldik va o‘rnatdik. Vazifa bajarildi: Har qanday sharoitda barqaror aloqa sifatini taʼminlashga qodir Ucell tayanch stansiyalari o‘rnatildi va uzoq muddatli avtonom ishlashga moslashtirildi.
Said Ali Rasulov ,“Aral-Plaza” sayyohlik majmuasining asoschisi va direktori:
“Mubolag‘asiz bu Qoraqalpog‘istonning ekologik turizmi uchun tarixiy lahza. Jami uchta tayanch stansiyaning o‘rnatilishi Orol dengizining qo‘shni hududlarini ishonchli aloqa va Internet bilan bog‘ladi. Shunday qilib, turistik dam olish maskanining xorijiy mehmonlari uchun xalqaro Rouming xizmatidan foydalanish imkoniyati ham taʼminlandi. Ucell kompaniyasiga hamkorlik uchun minnatdorchilik bildiramiz”.
Ucell mashhur sayyohlik joylarini yuqori tezlikdagi internet tarmog‘iga ulashni nazarda tutuvchi “Raqamli O‘zbekiston – 2030” strategiyasi maqsadlarini amalga oshirishga o‘z hissasini qo‘shmoqda. Orol dengizi bo‘yida tayanch stansiyalarini o‘rnatishdan avval Toshkent viloyatining Bo‘stonliq tumani kurort joylarida hamda Samarqand, Buxoro, Xiva kabi sayyohlik markazlarida tarmoqni modernizatsiya qilish bo‘yicha katta ishlar amalga oshirildi.
Reklama huquqi asosida.
Izoh (0)