18-iyun, seshanba kuni Yevro—2024 guruh bosqichi 1-tur uchrashuvida Portugaliya terma jamoasi Chexiyani qiyinchilik bilan (2:1) mag‘lub etdi. Ikkinchi bo‘limga qo‘shib berilgan daqiqalarda g‘alaba golini zaxiradan maydonga tushgan Fransisko Konseysao kiritdi.
Portugaliya terma jamoasi sardori Krishtianu Ronaldu to‘liq 90 daqiqa davomida maydonda bo‘ldi va o‘yin oldidan ijtimoiy tarmoqlar orqali muxlislarga murojaat qildi.
“Bugun tariximizning yana bir bobi boshlanadi. Terma jamoa safidagi ilk kunim – qiyinchiliklar va g‘alabalarga to‘la yo‘lning boshlanishini xursandchilik bilan eslayman. Hozirda iqtidor va ambitsiyalarga to‘la chempion jamoa bilan birga bo‘lish sharafiga muyassarman. Sizning qo‘llab-quvvatlashingiz tufayli biz orzularni haqiqatga aylantiramiz. Keling, yana bir g‘alaba uchun birgalikda kurashaylik. Biz birga bo‘lganimizda, bizni to‘xtatib bo'lmaydi. Portugaliyaga, olg‘a!”.
Terma jamoalar tarixidagi eng yaxshi to‘purar bu safar gol ura olmadi, biroq uning maydonda bo‘lishi yangi rekordlar o‘rnatishiga yetarli bo‘ldi. Germaniyadagi turnir portugaliyalikning faoliyatidagi oltinchi Yevropa chempionatiga aylandi. Ronaldudan keyingi o‘rinda uning jamoadoshi Pepe va Xorvatiya terma jamoasi yarim himoyachisi Luka Modrich hozirda o‘zlarining beshinchi qit’a chempionatida qatnashmoqda.
Bundan tashqari, Krishtianu Yevroda o‘tkazilgan o‘yinlar soni bo‘yicha o‘zining rekordini yangiladi: hozir uning hisobida 26 ta o‘yin mavjud. Ronalduning Yevropa chempionati bilan bog‘liq boshqa ko‘plab rekordlari ham mavjud:
- eng ko‘p o‘yin daqiqalar soni (2243);
- eng ko‘p g‘alabalar soni (13);
- jamoa sardori sifatida eng ko‘p o‘yinlar soni (17);
- final bosqichida eng ko‘p gollar soni (14);
- saralash bosqichida eng ko‘p gollar soni (41).
Krishtianu Ronaldu ushbu chempionatda eng keksa gol muallifiga aylanishi mumkin. Portugaliya terma jamoasi sardori hozir 39 yoshda va amaldagi rekord Avstriya terma jamoasining sobiq yarim himoyachisi Ivitsa Vastichga tegishli bo‘lib, u 2008-yilda gol urgan vaqtida 38 yosh-u 257 kunlik edi.
Portugaliya terma jamoasi ikkinchi turda Turkiyaga qarshi 22-iyun kuni bahs olib boradi.
Izoh (0)