Farg‘ona viloyati Marg‘ilon shahrida 24 ming 440 quti tamaki mahsulotini noqonuniy muomlaga kiritilishining oldi olindi, deb xabar beradi Bosh prokuratura huzuridagi departament.
Qayd etilishicha, departamentning Marg‘ilon shahar bo‘limi va IIB xodimlari hamkorligida tezkor tadbir o‘tkazilgan. Tadbirda tamaki mahsulotlari savdosi bilan shug‘ullanib kelgan M.X. Rayhon ko‘chasidagi qurilishi tugallanmagan binoda umumiy bahosi 220 million so‘mlik xorijda ishlab chiqarilgan to‘rt turdagi jami 24 ming 440 quti tamaki mahsulotlarini o‘tkazish maqsadida saqlab kelgani aniqlanib, ushbu mahsulotlar ashyoviy dalil sifatida olingan.
Mazkur holat yuzasidan Jinoyat kodeksining 25, 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Urgut, Qo‘shko‘pir, Yangihayot hamda Namangan tumanlarida qalbaki aksiz markali alkogol va tamaki mahsulotlarini muomalaga kiritilishining oldi olingani, O‘zbekistonda alkogol va tamaki bozorini tartibga solish inspeksiyasi tashkil etilishi to‘g‘risida xabar berilgandi.
Izoh (0)